Վա՜յ քեզ քաղաք, որ թագաւորդ մանուկ է

Վստահ եմ թէ այս սիւ­նա­կի ըն­թերցող­նե­րը ար­դէն հե­տեւած են նաեւ Օր­թա­գիւ­ղի Սուրբ Աս­տո­ւածա­ծին Եկե­ղեց­ւոյ թա­ղական խոր­հուրդէ ներս ծա­գած տա­րակար­ծութիւննե­րուն։

Մենք այդ բո­լորին վե­րահա­սու եղանք թեր­թիս սիւ­նա­կագիր Յով­հաննէս Քը­լըչ­տա­ղըի յօ­դուա­ծով։

Իս­կա­պէս ալ մտա­հոգիչ տե­ղեկու­թիւններ կա­յին այդ յօ­դուա­ծի բո­վան­դա­կու­թեան մէջ։ Յօ­դուա­ծը հրա­տարա­կելէ ետք իս­կոյն լծո­ւեցանք խնդրին էու­թիւնը կող­մե­րէն լսե­լու։ Մե­զի հա­սած այդ պա­տաս­խաննե­րով ալ խմբագ­րե­ցինք նա­խորդ շա­բաթո­ւայ «Ակօս»ի խո­րագի­րը։ Մեր այդ լրատ­ւութե­նէն ետք է, որ Թա­ղական խոր­հուրդը բա­ցատ­րութիւն մը հրա­պարա­կեց թա­ղակա­նու­թեան հա­մացան­ցի հա­շիւ­նե­րէն։

Նոյն օր թէ՛ «Մար­մա­րա» եւ թէ «Ժա­մանակ» ար­ձա­գան­գե­ցին այս պա­տաս­խա­նին՝ որու շնոր­հիւ իրենց ըն­թերցող­ներն ալ լսած են թէ խնդիր մը կայ Օր­թա­գիւ­ղի թա­ղակա­նու­թեան հետ առնչո­ւած։

Խնդիր մը կար, բայց ի՞նչ էր այդ խնդի­րին էու­թիւնը, այդ մա­սին պատ­կե­րացում մը ձե­ւաւո­րել կա­րելի չե­ղաւ։ Մենք «Ակօս»ի գրող­ներս սրտցա­ւօրէն տե­սանք որ վար­չութիւննե­րը փո­խուին ան­գամ վար­չա­յին­նե­րու հաս­կա­ցողու­թիւննե­րը եր­բեք չեն փո­խուած։ Ներ­կայ թա­ղակա­նու­թիւնն ալ փո­խանակ եղած­նե­րուն յստա­կացում բե­րելու, կը դի­մէ անի­մաստ ինքնա­պաշտպա­նու­թեան։ Նախ կ՚ըսէ թէ խնդրոյ առար­կայ մի­ջադէ­պը պա­տահած է ամիս­ներ առաջ։ Այս ըսե­լով հասկցնել կը ջա­նայ թէ լրատ­ւութիւ­նը ժա­մանա­կավ­րէպ է։

Սա­կայն եր­բեք չանդրա­դառ­նար խնդրի լրջու­թեան։ Պա­տահա­ծը կը նկա­րագ­րէ վար­չութեան եր­կու ան­դամնե­րու տա­րակար­ծութե­նէն ծա­գած բա­նավէճ մը ըլ­լա­լով։ Բա­ցար­ձա­կապէս չի խօ­սիր «Ես գորշ գայ­լե­րու շրջա­նակէն եմ» ըսե­լով, իր գոր­ծընկերոջ սպառ­նա­ցող թա­ղակա­նին։ Այս խօս­քը լսե­լով բա­նավէ­ճը պարզ տա­րակար­ծութիւն մը հա­մարե­լը միամ­տութե­նէ շատ աւե­լի վեր, կա­տարեալ տգի­տու­թիւն մըն է։ Թա­ղական խոր­հուրդի ատե­նապե­տը փո­խանակ այս բո­լորը ծած­կել փոր­ձե­լու պէտք էր հրա­ժարու­մի հրա­ւիրէր գորշ գայ­լե­րու բա­րեկա­մու­թիւնով իր գոր­ծընկեր­նե­րուն սպառ­նա­ցող թա­ղակա­նը։

Ընդ հա­կառա­կը ան սոց ցան­ցի վրայ կա­տարած հրա­պարա­կու­մով այս լրա­տուու­թիւնը պար­զողնե­րը կը մե­ղադ­րէր նա­խորդ վար­չութեան փո­ղը հնչեց­նե­լով։

Ո՛չ Յով­հաննէս Քը­լըչ­տա­ղը, ոչ ալ «Ակօս»ի անձնա­կազ­մէն որե­ւէ մէկս եր­բեք կա­րիք չենք ու­նե­ցած նախ­կին թա­ղակա­նու­թեան սա­տարե­լու։ Թեր­թիս ըն­թերցող­նե­րը դար­ձեալ քաջ գի­տեն թէ նա­խորդ վար­չա­կազ­մին դէմ ալ ամե­նասուր քննա­դատու­թիւննե­րը հնչած են «Ակօս»ի սիւ­նակնե­րէն։

Ի՞նչ ըսենք որ այս հա­մայնքի բո­լոր հաս­տա­տու­թիւննե­րէ ներս գի­տակ­ցութեան ահ­ռե­լի նա­հանջ մը կայ։ Իբ­րեւ թէ վար­չա­յին կո­չուած մար­դիկ փո­խանակ աւե­լի թա­փան­ցիկ վա­րուե­լու, ընդհա­կառա­կը կը քօ­ղար­կեն իրենց կազ­մէն եկող այս գայ­թակղե­ցու­ցիչ ելոյթնե­րը։ Ար­ժէքնե­րու հա­մակարգն է, որ խախ­տած է ան­գամ մը եւ մա­մուլն ալ իր կար­գին երեք կա­պիկ­նե­րը կը խա­ղայ եւ կ՚ան­տե­սէ կա­տարո­ւած լրա­տուու­թիւնը ու կը սպա­սէ թա­ղակա­նու­թեան պա­տաս­խա­նը, որ­պէսզի իր սիւ­նակնե­րը բա­նայ այս խնդրին դի­մաց։

Իս­կա­պէս ցա­ւալի եւ մտա­հոգիչ է։ Ու­րեմն թա­ղակա­նու­թեան մէջ զեղ­ծա­րարու­թեան պնդումներ պի­տի ներ­կա­յացո­ւին, ատոր փո­խարէն ոմանք «գորշ գայ­լեր» բա­ռը գոր­ծա­ծելով պի­տի սպառ­նայ եւ «Ակօս«ն ալ այս բո­լորը ժո­ղովուրդին իմաց­նե­լով խառ­նա­կիչ պի­տի դառ­նայ։

Վա՜յ ձեզ եւ վա՜յ մեզ քա­ղաք, որ ին­կեր ենք մա­նուկ թա­գաւոր­նե­րու ձեռ­քին։

[email protected]