ԾՈՎԻՆԱՐ ԼՈՔՄԱԿԷՕԶԵԱՆ
Դեկտեմբերի 16-ին Երեւանում երկու դրամատան մասնաճիւղերի նկատմամբ յարձակում կատարուեց եւ մի մասնաճիւղից յաջողուեց պայթեցման եղանակով տանել 7,5 միլիոն դրամ (1 տոլարը այսօրուայ դրութեամբ 481 դրամ է կազմում)։ Թալանի դէպք էր անշուշտ, բայց գողութիւն, թալան եւ կողոպուտ հասկացութիւնները Հայաստանի անկախութեան օրուանից ի վեր օգտագործուել է միայն պետութեան, կառավարութեան, բարձրաստիճան պաշտօնեաների հանդէպ, որոնք զբաղեցնելով պաշտօնը, միլիառներ էին կուտակում մեր աղքատիկ նորանկախ երկրում եւ մեկնում աչքից հեռու, ուրիշ մի մայրցամաք։ Իսկ դրամատան մասնաճիւղի գողերին կարելի է հասկանալ։ Առջեւում Ամանոր է, որը պահանջում է պարտադիր ծախսեր, իսկ գները տօների առթիւ աճել են…։ Պարզ աշխատավարձով կամ թոշակով նոյնիսկ կազի եւ ելեկտրականութեան մուծումները դժուար է կատարել ցրտաշունչ ձմեռուայ պայմաններին, իսկ նման պաղ ձմեռ չէր եղել 1975-ից ի վեր, երբ գիշերները ջերմաստիճանը -20 է, իսկ ցերեկները -10։ Ժողովուրդն արդէն իւրացրել հետեւեալ դասը.
Գողութիւնը յանցանք է, մեծ գողութիւնը պիզնես է, իսկ ժողովրդին թալանելը՝ քաղաքականութիւն է։
Այսօրուայ լրագրողները ճանճերի պէս պտըտւում են բարձրաստիճան պաշտօնեաների շուրջ եւ անկեղծ հարցեր են տալիս նրանց ծախսերի վերաբերեւալ, օրինակ, ինչո՞ւ նախագահ Սերժ Սարգսեանը մեծահարուստ Սամուէլ Կարապետեանի աւագ որդու հարսանիքի արարողութեանը Մոսկուայ մեկնեց պետական միջոցների հաշուին. Որքա՞ն են պետական այրերը ծախսում օդանաւի տոմսերի եւ հիւրանոցների վրայ, այդ ամէնը յարկատուների, այլ ոչ թէ նրանց սեփական փողերն են եւ չի կարելի ճոխութիւն դրսեւորել։ Տնտեսագէտներն ասում են, որ պետական վարչարարութեան աշխատակիցների թիւը հաւասար է մասնաւոր սեկտորի թուաքանակին, այսպիսով բնակչութեան մի կէսը պահում է միւս կէսին, եւ այդ կէսը միշտ պիտի հաշիւ պահանջի պետական այրերից իրենց ծախսերի մասին։ Դա կանխելու համար Դեկտենբերի 16-ին մի օրինագիծ ընդունեցին. այսույետ նախագահի, վարչապետի եւ Ազգային Ժողովի խօսնակի արարողակարգային ծախսերը անվտանգութեան նկատառումներից ելնելով դառնում են գաղտնի։ Այսպիսով գտնուեց ճանճերի դէմ ուղղուած ինչ-որ միջոց։
Իսկ միւս կողմից մի ուրիշ օրինագիծ ընդունուեց՝ ապօրինի հարստացման քրէականացման մասին, որը սակայն յետադարձ ուժ չունի եւ գործելու է Յուլիս ամսից, հակառակ դէպքում բանտախցերը չէին բաւականցնի բարձրաստիճան պաշտօնեաների հոսքի համար։ 5 միլիոն դրամից աւելի եկամտի աղբիւրը այսույետ բացատրութեան կարիք պիտի ունենայ, սակայն գեղեցիկ օրէնքների երկրում երբեք ականատես չեղանք, որ գէթ մէկ թալանչի բռնուէր եւ պատժուէր։ Դրա փոխարէն տեսանք, որ ռեստորաններում եւ ակումբներում կամ հիւրանոցների ճեմասրահներում, որտեղ դաշնամուր կար դրուած, գործից ազատեցին երաժիշտ-դաշնակահարներին, զրկելով նրանց մի կտոր հացից, որոնք նրանք վաստակում էին իրենց երաժշտական շնորհքով…
Ապրիլեան պատերազմը հաստատեց այն փաստը, որ մենք շարունակում ենք գտնուել պատերազմի մէջ, իսկ բանակը ինչպէս եւ միւս բոլոր կառոյցները թալանուած է, եւ պաշտպանութեան նախարարը դիմեց աշխատող ժողովրդին, որպէսզի նա աշխատավարձից պարտադիր կամաւոր 1.000 դրամներ մուծի ապագայում զոհուած կամ հաշմանդամ դարձած զինուորի հիմնադրամին, խոստանալով, որ այս հիմնադրամից գողութիւն չի արուելու։ Յանցաւորը միշտ Հայաստանից դուրս է գտնւում։ Օրինակ, Ատրպէյճանը այնքան անառակ է, որ երբեք չի յայտարարում իր յարձակման մասին, եւ այսպիսով խաթարում է թալանի անդորրը, եւ քանի որ թալանուած պետութիւնը ի վիճակի չէ ապահովել ապագայ զոհուածների եւ վիրաւորուածների թոշակը, ուրեմն ժողովուրդը պիտի 1.000 դրամներով սատարի բանակը։ Տնտեսութեան անկումն էլ Հայաստանում միշտ բացատրել են արտաքին գործօնների առկայութեամբ։ Տարիներ շարունակ մեզ ասում էին, որ համաշխարհային ճգնաժամը թոյլ չի տալիս, որ մեր երկիրը զարգանայ։ Հիմա էլ յանցաւորը Ռուսաստանի դէմ ուղղուած պատժամիջոցներն են, որի պատճառով խիստ կրճատուել են տրանսֆերները (դրամական փոխանցումները) Ռուսաստանից։ Հայաստանը կապուել է Եւրասիական Միութեանը եւ խիստ կախում ունի Ռուսաստանից, ուստի Ռուսաստանի վատթարացումը հանգեցնում է նաեւ Հայաստանի վատթարացմանը։ Չհերքելով այդ փաստը՝ նախագահ Սերժ Սարգսեանը յայտարարում է, որ եթէ չանդամակցէինք Եւրասիական Միութեանը, ապա մեր վիճակը շատ աւելի վատ կը լինէր։ Այս յայտարարութիւնը ես հաւանեցի։ Ո՞վ չգիտի, որ վատից աւելի վատը կայ։ Առաւել եւս երկրի ղեկավարի առումով։
