Հարցաքննութիւն վեց հոգեւորականներու դէմ
Հայաստանի քննչական կոմիտեն արձագանգած է Հայ Առաքելական Եկեղեցւոյ խումբ մը հոգեւորականներու բերման ենթարկելու մասին լուրերուն։
«Արմենփրես»-ի հետ զրոյցին քննչական կոմիտէն պարզաբանած է, որ նախաձեռնուած քրէական վարոյթի շրջանակներուն կը կատարուին վարութային եւ ապացուցողական անհրաժեշտ գործողութիւններ։
«Իշխանական կամ ծառայողական լիազօրութիւնները կամ անոնցմով պայմանաւորուած ազդեցութիւնը օգտագործելով հաւաք անցկացնելու կամ անոր մասնակցելու խոչընդոտելու կամ հարկադրելու, ինչպէս նաեւ հաւաքին մասնակցելու կամ հաւաքին մասնակցելէ հրաժարելու նպատակով նիւթապէս շահագրգռելու դէպքի առթիւ նախաձեռնուած քրէական վարոյթի նախաքննութեան շրջանակներուն կը կատարուին վարութային եւ ապացուցողական անհրաժեշտ գործողութիւններ: Լրացուցիչ հանդէս կու գանք յայտարարութեամբ»,- ըսուած է Քննչական կոմիտէի պարզաբանման մէջ:
Աւելի վաղ փաստաբան Արա Զոհրապեանը յայտնած էր 6 հոգեւորականներու բերման ենթարկելու մասին։
Ըստ Զոհրապեանի տարածած տեղեկատւութեան՝ բերման ենթարկուած են Հայ Առաքելական Եկեղեցւոյ Արագածոտնի թեմի առաջնորդ Մկրտիչ եպիսկոպոս Պռոշեանը, նոյն թեմի եւս 5 հոգեւորականներ՝ Տէր Փառեն, Տէր Մանուկ, Տէր Հայկ, Տէր Ղեւոնդ, Տէր Մկրտիչ քահանաները։
Ըստ փաստաբանի՝ բերման ենթարկուած են նաեւ Արագածոտնի թեմի աշխարհիկ աշխատակիցներ։
Աւելի վաղ նաեւ Մայր Աթոռի տեղեկատուական համակարգէն հաստատած էին Արագածոտնի թեմի խումբ մը հոգեւորականներու ձերբակալութիւնները՝ յաւելելով, որ իրաւապահները խուզարկութիւն իրականացուցած են Արագածոտնի թեմի առաջնորդ Մկրտիչ եպիսկոպոս Պռոշեանի տունը։ Յիշեցնենք, որ Արագածոտնի թեմի առաջնորդ Մկրտիչ եպիսկոպոս Պռոշեանը Ամենայն Հայոց Կաթողիկոս Գարեգին Բ-ի քրոջ որդին է։
Հայաստանի մարդու իրաւունքներու պաշտպանի աշխատակազմի արագ արձագանգման խումբը մեկնած է Քննչական կոմիտէ՝ ազատութենէն զրկուած հոգեւորականներու իրաւունքներու ապահովման վիճակին եւ ազատութենէ զրկելու հիմքերուն տեղին ծանօթանալու նպատակով։
«Արմենփրես»-ի փոխանցումով այս մասին կը յայտնեն ՄԻՊ գրասենյակէն:
«Հայաստանի մարդու իրաւունքներու պաշտպանի աշխատակազմը Հոկտեմբեր 15-ին զանգուածային լրատւութեան միջոցներու եւ սոցիալական մետիայի մշտադիտարկման արդիւնքին տեղեկութիւն ստացած է Հայ Առաքելական Եկեղեցւոյ խումբ մը հոգեւորականներու բերման ենթարկման վերաբերեալ:
Սաղմոսավանքի հոգեւոր հովիւ Տէր Փառեն քահանայ Առաքելեանը, որ բերման ենթարկուած էր ՀՀ քննչական կոմիտէի քննուող քրէական վարոյթի շրջանակներով, ազատ արձակուած է։
Քննչական կոմիտէի շէնքէն դուրս գալէ ետք ան կարճ հարցազրոյց տուած է «Ազատութիւն» ռատիօկայանին՝ նշելով, որ իր մասնակցութեամբ որեւէ քննչական գործողութիւն չէ իրականացուած։
Ան նշած է, որ իրեն բաց թողած են եւ տուն երթալու է։
