Իրականում այս դէպքը՝ լինելով արտակարգ, աւելի շատ անհաւատալի դէպք էր։ Դէպքը տեղի ունեցաւ այս օրերին այն շէնքում, որտեղ ես բնակւում եմ. ինը յարկանի շէնքի 7–րդ յարկում, իսկ աւելի ճիշդ օդում, մեր շէնքից դուրս։ Այդ 7–րդ յարկի բնակիչների մասին շատ քիչ տեղեկութիւն ունեմ. մեր ժամանակներում դրացիները շատ քիչ բան գիտեն միմեանց մասին։ Միայն ծանօթ էի տանտիրուհու հետ, որը կարծեմ Աւստրալիայում էր ինչ-որ ժամանակ ապաստանել եւ յետոյ Հայաստան վերադարձաւ։ Երբեմն այնտեղից դաշնամուրի նուագ էր լսւում… Հիմա իմացայ, որ դա նրա դուստրն էր նուագում՝ Քրիստինան, որը երաժշտանոցի ուսանողուհի է։
Եւ ահա Քրիստինայի հետ Յունուարի 10-ին պատահեց տարօրինակ մի դէպք, որն արձանագրուեց արտակարգ դէպքերի շարքում։ Հաղորդագրութեան մէջ ասուեց, որ
«Ժամը 17.10 սահմաններում արտակարգ իրավիճակների նախարարութեան Փրկարար ծառայութեան 9-11 օպերատիվ կառավարման կեդրոն ահազանգ է ստացուել, որ Քանաքեռ-Ձէյթուն վարչական շրջանում՝ Սուրէնեանց փողոցի բարձրայարկ շէնքերից մէկի 7-րդ յարկի բնակիչն ընկել է եւ յայտնուել է 6-րդ յարկի հարեւանի լուացքի պարանի վրայ։ Ինչպէս յայտնում է ֆոտոլրագրող Գագիկ Շամշեանը, օպերատիվօրէն ժամանել են ԱԻՆ ՓԾ թիւ 5 հրշէջ-փրկարարական ջոկատը եւ թիւ 8 հրշէջ-փրկարարական ջոկատն ու ավտոսանդուղք։ Ժամանել են նաեւ ԱԻՆ ՓԾ ճգնաժամային կառավարման ազգային կեդրոնի օպերատիվ խումբը՝ խմբի պետ Արթուր Վելեանի գլխաւորութեամբ…» Եւ այլն, եւ այլն։
Սա պաշտօնական հաղորդագրութիւն է եւ կանգ չի առնում առեղծուածների վրայ, իսկ փրկարարները շտապում են միւս արտակարգ դէպքերի մէջ յայտնուած քաղաքացիներին օգնութիւն ցուցաբերել։ Ժողովուրդն էլ մի հոգոց է հանում «Փառք քեզ, Տէր Աստուած», որ դէպքը ունեցաւ երջանիկ աւարտ։ Եւ միայն նոյն շէնքի եւ փողոցի բնակիչների համար, որոնք 30-60 րոպէ հետեւում էին այս դէպքի ընթացքին եւ ամէն երկվայրկեան սպասում էին, որ աղջիկը կարող է վայր ընկնել, այս դէպքը մեծ հոգեկան հետք թողեց, որովհետեւ մեզ ոչ միայն աւարտը հետաքրքրեց, այլ դէպքի սկիզբը։ Ո՞նց եղաւ, որ աղջիկը պատուհանից դուրս ընկաւ եւ յայտնուեց կէսմեթրանոց երկաթի կտորի վրայ։
Մի փոքրիկ ճշդում անեմ. փողոցի անունը Սուրէնեանց չի, այլ Սուրէնեան։ Սուրէնեանց փողոցը գտնւում է Երեւանի Կեդրոն վարչական շրջանում, իսկ մեր փողոցը կոչւում է Նազատէթ Սուրէնեանի փողոց եւ գտնւում է մոնումենտ կոչուող տարածքում։ Ինչեւէ…
Այսպիսով Յունուարի 10-ն էր… Ցերեկ էր։ Հարսս ինչ-որ մի դխկոց լսեց պատուհանի հետեւում, իսկ տղաս նայեց ներքեւ եւ մարդ տեսաւ՝ կանգնած 6–րդ յարկի երկաթի կտորի վրայ, որն ամրացնում են լուացքի պարանների համար։ Աղջկայ ձեռքերը պատին էին հենուած։ Տղաս մտածեց, որ ինքնասպան է ուզում լինել։ 19-20 տարեկան Քրիատինան էր, որը յայտնուել էր այդ երկաթէ կտորի վրայ, ինչը բացարձակ անհաւանական էր, որովհետեւ եթէ մարդ 7-րդ յարկից վայր ընկնի, ապա գլխիվայր կ՚ընկնի, այլ ոչ թէ ոտքերով կը յայտնուի 6-րդ յարկի երկաթէ կտորի վրայ։ Ի դէպ հիմա որ ներքեւ եմ նայում մեր 9-րդ յարկից, ապա ո՛չ 7- րդ յարկում, ո՛չ էլ 6-րդ յարկում ո՛չ մի պարաններ չեմ տեսնում, նոյնիսկ պոկուած, այսինքն այդ յարկերի բնակիչները հազուադէպ էին այստեղ լինում։ Բռնուելու տեղ չկար, հաւասարակշռութիւն պահելը անհնար էր։ Բայց յետոյ կատարուեց աւելի անհաւանական բան. նա նստեց այդ երկաթի վրայ, կարծես հեծնեց եւ մնաց այդ դիրքում գրեթէ մէկ ժամ…
Այդ երկաթը նախկին բնակիչ Սեդրակն էր արել՝ շատ պինդ էր. կինը պատմեց, որ նոյնիսկ զարմանում էր, թէ ինչո՞ւ է այդքան ամուր սարքում, նա էլ թէ «Ես գիտեմ, ինչ եմ անում»։
Երկու բան զարմացրեց մեզ. ընկնելուց աղջիկը ո՛չ մի ձայն չհանեց, չբացականչեց, որը բնական կը լինէր, երբ մարդ յանկարծակի վայր է ընկնում։ Բացի այդ ո՛չ մի վախ, բարձրութեան վախ չէր զգում։ Նա գլուխը դէս ու դէն էր անում եւ խօսում ներքեւում կանգնած մարդկանց հետ, ասելով, որ տատիկին զանգէն ու կանչէն, որ ձեռքերը յոգնել են ու թուլանում են… Վերջապէս ներքեւից ոստիկանը նրան զգուշացրեց, որ ներքեւ չնայի եւ գլուխը չշարժի։ Եւ ահա պարանով ամրացուած՝ 8-րդ յարկից նրա մօտ իջաւ ՀՓՋ-ի աւագ հրշէջ Գէորգ Թորոսեանը։ Նա էլ էր յուզմունքից դողում, որովհետեւ եթէ յանկարծակի իջնելուց դիպչէր աղջկան, ապա աղջիկը վայր կ՚ընկնէր։ Գէորգը ձախ կողմից հաւասարուեց Քրիստինային եւ օգնեց նրան տեղափոխուել շարժասանդուղք։
Եւ ոչ ոք, ասելով «յայտնուեց երկաթէ ձողի վրայ»՝ չկարողացաւ ինքզինքը բացատրել, թէ ինչպէս աղջիկը ընկնելուց չընկաւ, այլ կանգնեց ոտքերով այդ երկաթէ ձողի վրայ։ Իսկ եթէ մարդկային տրամաբանութեամբ դա բացատրել հնարաւոր չէ, ուրեմն այս անգամ միջամտել էին անտեսանելի գերբնական ուժերը։ Հրեշտակները։ Ով չի հաւատում, թող ինքը փորձի պատկերացնել, ինչպէս կարելի է պատուհանից դուրս ընկնել եւ… չընկնել։
