Երիտասարդներու յեղափոխութիւնը գործի կը լծուի երիտասարդներէ բաղկացող կառավարութիւնով
ԱԼԻՆ ՕԶԻՆԵԱՆ
ՀՀ նախագահ Արմէն Սարգիսեան 10-12 Մայիս թուականներուն վաւերացուց Նիկոլ Փաշինեանի ներկայացուցած Նախարարաց խորհուրդը։ Անմիջական ակնարկով կարելի է ըսել, թէ նոր Նախարարաց խորհուրդը կը բաղկանայ երիտասարդ գործիչներէ, ուր կիներու համեմատութիւնը ակնկալուածէն աւելի նուազ է։ Այժմու նախարարները հասարակութեան ծանօթ դարձան յատկապէս դէպի իշխանափոխութիւն գացող ցոյցերու ընթացքին։ Ճիշդ է, որ նորանշանակ նախարարները ընդհանրապէս չունին քաղաքական փորձութիւն, բայց այս երեւոյթը մտահոգութիւն մը չի պատճառեր հասարակութեան մօտ, քանի որ շատեր համոզուած են, թէ հիմնական բարեփոխումները միայն երիտասարդներու ձեռքով կրնայ կատարուիլ։ Կառավարութեան երիտասարդագոյն անդամն է Սփիւռքի նախարար 28-ամեայ Մխիթար Հայրապետեան։ Հայրապետեան ժողովրդական երթի գաղափարը յղացողներէն է եւ մասնագիտութեամբ թրքագէտ։ Նախարարաց խորհուրդի մի այլ երիտասարդ անդամն է 29-ամեայ Տիգրան Աւինեան, որ Լոնտոնի մէջ ուսանած է Ֆինանսներու նիւթով։ Հայաստանի պաշտպանութեան նախարարութիւնը յատուկ պատուոյ գրով մը գնահատած է Աւինեանի քառօրեայ պատերազմի օրերուն կատարած գործունէութիւնը։
32-ամեայ Սուրէն Պապիկեան կը զբաղեցնէ տարածքային կառավարման եւ զարգացման նախարարի պաշտօնը։ Նոյնպէս երիտասարդ նախարարներ կը համարուին վարչապետի օգնական 39-ամեայ ակադեմական Արարատ Միրզոյեան եւ իրեն տարեկից Կրթութեան նախարար արեւելագէտ Արայիկ Յարութիւնեան։ Հայաստանի նոր կառավարութեան իրենց դրոշմը կը բերեն գունագեղ կերպարներ։ Անոնցմէ մէկն է վարչապետութեան գլխաւոր տեղակալ 32-ամեայ Էտուարտ Աղաճանեան, որ նախքան այս պաշտօնը ստանձնել կը զբաղէր երաժշտութեամբ եւ իր կիթառ նուագած վիտիօները լայն տարածութիւն գտած են Հայաստանի մէջ։ Քաղաքականութեան դաշտին նոր մասնակցող այս անուններու կարգին կան նաեւ այդ ոլորտէ ներս որոշ փորձառութիւն ձեռք բերած զանազան դէմքեր, որոնք եկած են Նիկոլ Փաշինեանի կառավարութիւնը ալ աւելի զօրացնելու։ Այդ տեսակի օրինակներէն մէկն է Արտակարգ իրավիճակներու նախկին նախարարի տեղակալ Դաւիթ Տոնոյեան, որ այժմ փոխարինած է Պաշտպանութեան նախարար Վիգէն Սարգիսեանին։
Թէ հասարակութեան մօտ եւ դիւանագիտական շրջանակներու մօտ ընդունելութիւն գտած անուն մը եղաւ Արտաքին գործոց նոր նախարար Զոհրապ Մնացականեան։ Ան նախապէս ՄԱԿ-ի մօտ ներկայացուցած էր Հայաստանը եւ նաեւ աշխուժօրէն մասնակցած էր ԵՄ-ի հետ համագործակցութեան ծրագրին։ Այստեղ կարեւոր է նշել, թէ Մնացականեան ցարդ որեւէ կուսակցութեան չէ անդամակցած եւ ունէր դիւանագիտական մեծ փորձառութիւն։
Հայաստանի ազգային ժողովի մէջ երկրորդ կարեւորագոյն ուժը կը ներկայացնէ երկրի կարեւորագոյն օլկարխներէն Գագիկ Ծառուկեանի գլխաւորած Ծառուկեան դաշինքը։ Այժմ այս խմբակցութիւնը ունի երեք նախարարութիւններ, որոնք են՝ Ուժանիւթի եւ բնական պաշարներու նախարարութիւնը Արթուր Գրիգորեանի, Արտակարգ իրավիճակներու նախարարութիւնը Հրաչեայ Ռոստոմեանի եւ Մարմնամարզի ու երիտասարդութեան նախարարութիւնը Լեւոն Վահրատեանի միջոցաւ։
Փաշինեանի յեղափոխութեան օրերուն յաճախ արտասանած «օլիկարխները երկրէն պիտի մաքրենք» խոստումէն ետք Ծառուկեան դաշինքի հետ համագործակցիլը զարմանալի կը թուի զանազաններուն։ Այս մասին լրագրողներու հետ հանդիպման ժամանակ Փաշինեան կրկնեց իր խոստումը ըսելով. «Ժողովուրդի կողմէ ընտրուած եմ։ Օլիկարխներու հետ պայքարի մէջ ետքայլ պիտի չըլլայ»։
Նախորդ շրջանին համախոհական կառավարութեան մասնակից ՀՅԴ նոր կառավարութեան մէջ ալ կը ներկայանայ երկու նախարարներով։ Արծուիկ Մինասեան կը ստանձնէ Տնտեսական զարգացման նախարարութիւնը, իսկ Արթիւր Խաչատրեան Գիւղատնտեսութեան նախարարութիւնը։
Հայաստանի նոր կառավարութեան մէջ տեղ գտած են միայն երկու նախարարուհիներ։ Մշակոյթի նախարարուհի Լիլիթ Մակունց եւ Աշխատանքի ու ընկերային հարցերու նախարարուհի Մանէ Թանտիլեան։
Կանխահաս ընտրութիւնները շուտով
Շաբթու սկիզբին ելոյթ մը ունենալով Վարչապետ Փաշինեան յայտնեց, թէ կանխահաս ընտրութիւնները անպայման տեղի կ՚ունենան սոյն տարուայ մէջ։
Հայաստանի մէջ շատեր համոզուած են, որ իսկական յեղափոխութիւնը պիտի կայանայ թափանցիկութեան պայմաններու տակ իրականացող նոր ընտրութիւններէն ետք։ Հազիւ այսպէսով պիտի փոխուի Ազգային ժողովի մէջ ուժերու համեմատութիւնը։ Վարչապետը իր դիմատետրի միջոցաւ յայտարարեց աշխարհահռչակ տնտեսագէտ Տարօն Աճեմօղլուի ուղղած հրաւէրը եւ ստացած դրական պատասխանը, որու մանրամասնութիւններու կանդրադառնանք կողքի սիւնակներուն վրայ։
