Երեւանի մէջ պիտի բացուի Շառլ Ազնաւուրի արձանը
Երեւանի Քաղաքապետարանը 18 Յուլիսին պիտի բանայ ֆրանսահայ անուանի երգիչ Շառլ Ազնաւուրի արձանը։ 2024-ի Փետրուարին Շառլ Ազնաւուրի 100-ամեակի յիշատակման համար նախատեսուած արձանի նախագիծին 60 տարբեր քանդակագործներ 100-էն աւելի արձանի նախագիծներ ներկայացուցին Երեւանի Քաղաքապետարանին եւ Ազնաւուր Միութեանը։
Անոնց մէջէն քանդակագործ Դաւիթ Մինասեանի քանդակը առաջին տեղը գրաւեց։ Երեւանի քաղաքապետի տեղակալ Լեւոն Յովհաննիսեանը քաղաքապետարանի նիստի ժամանակ յայտնեց, որ արձանը կը ձուլուի Կիւմրիի մէջ եւ այս շաբաթուայ ընթացքին պիտի աւարտի։
Լեւոն Յովհաննիսեան ըսաւ. «16 Յուլիսին արձանը պիտի տեղադրենք Երեւանի Շառլ Ազնաւուր հրապարակը եւ երկու օր ետք պիտի կայանայ պաշտօնական բացումը»։ Բացման արարողութեան կը սպասուի նաեւ Ֆրանսայի պաշտօնական պատուիրակութեան մասնակցութիւնը։
Մայիս ամսուն Շառլ Ազնաւուրի 100-ամեակի առթիւ Փարիզի Քաղաքապետարանը քաղաքի ամենաաշխոյժ տարածքին գտնուող այգի մը կոչեց Շառլ Ազնաւուրի անունով։ Միւս կողմէ Հայկական Ֆիլմերու Փառատօնը 3 Սեպտեմբերին պիտի բացուի Լոս Անճելըսի մէջ «Monsieur Aznavour» ֆիլմով։ Ֆրանսացի ռեժիսորներ Մեհտի Իտիր եւ Կրանտ Գորփս Մալատիի համատեղ բեմադրութեամբ «Monsieur Aznavour» ֆիլմին մէջ Շառլ Ազնաւուրի կերպարը կը մարմանւորէ Թահար Ռահիմ։
