Եըլմազ Կիւնէյ Մշակոյթի եւ Արուեստի Գ. Փառատօն
Անուանի բեմադրիչ եւ դերասան Եըլմազ Կիւնէյի անունով յիշուած «Եըլմազ Կիւնէյ մշակոյթի եւ արուեստի Գ. փառատօն»ը կազմակերպուած է «100 ծաղկունք մշակոյթի կեդրոն»ի եւ Տէրսիմի քաղաքապետարանի համատեղ ջանքերով եւ Եըլմազ Կիւնէյ հիմնարկի աջակցութեամբ։
Փառատօնի շրջագծին մէջ պիտի ներկայացուի կարճամեթրաժ գեղարուեստական ու վաւերագրական ֆիլմեր, ֆիլմերու սցենարներ, պատմուածքի, բանաստեղծութեան, երգիծանկարի եւ լուսանկարչութեան արտադրութիւններ։ Պատմուածքներու եւ բանաստեղծութիւններու համար բացի թրքերէնէ, քրտերէն, զազաերէն եւ հայերէն լեզուներով ալ դիմումներ պիտի ընդունուին։
Դիմումները կը սկսին 1 Փետրուարէն ու կը տեւէ մինչեւ 15 Ապրիլ։ Իսկ փառատօնը կը կայանայ 15 Ապրիլ 1 Յունիս 2020 թուականներու միջեւ Իսթանպուլ, Տէրսիմ եւ այլ քաղաքներու մէջ կազմակերպուած միջոցառումներով։
Ձեռնարկը աւարտին կը հասնի 7 Յունիսի Իսթանպուլի եւ 14 Յունիսին ալ Տէրսիմի մէջ տեղի ունենալիք մրցանակաբաշխութեամբ։
Փառատօնի մասնակցելու համար մանրամասնութիւնները կարելի է լսել՝ www.yilmazguneyksf.org կայքէջի միջոցաւ։
Այս մասին հրապարակուած մամլոյ յայտարարութեան մէջ կը նշուի նաեւ փառատօնի գաղափարախօսութիւնը։ «Շուկայի գեղարուեստական արտադրութիւնը մրցակցութեան նիւթ դարձնող եւ անհատական կիրքերը գրգռող մերձեցման դէմ մենք կը ներկայանանք համատեղ արտադրութիւնը, համագործակցութիւնը խրախուսող մերձեցումով մը փառատօն կազմակերպելու։ Եըլմազ Կիւնէյի արուեստի հասկացողութեան հիմքը ժողովուրդին ի նպաստ արուեստական արտադրութիւն ընող սիրողական կամ արհեստավարժ բոլոր արուեստագէտները հասարակական հարթակի մը վրայ մէկտեղել է։ Արդարեւ Եըլմազ Կիւնէյի վերանորոգուած ֆիլմերն ալ շրջուն ցուցադրութիւններով կրկին անգամ պիտի փոխադրուի հանդիսատեսին»։
«Ակօս» փառատօնի մամուլի միջոցաւ զօրակցելու նախադրութեամբ իր յաջորդ թիւերուն մէջ ալ պիտի արձագանգէ «Եըլմազ Կիւնէյ մշակոյթի եւ արուեստի Գ. փառատօն»ի լուրերուն։
