Ոստիկան Զօրաց պաշտօնեաներն ալ դեր ունին
ՈՒՅԿԱՐ ԿԻՒԼԹԷՔԻՆ
Հրանդ Տինքի սպանութեան դատավարութիւնը կը շարունակէ օրակարգ զբաղեցնել։ Պետական պաշտօնեաներու հարցաքննութիւնը կատարող դատախազ Կէօքալփ Քէօքճիւի պատրաստած ամբաստանագրին Գլխաւոր Դատախազութեան կողմէ մերժուելէն ետք հիմա Դատախազներու եւ Դատաւորներու Վերին Խորհուրդի մօտ բողոք ներկայացուած է դատախազ Քէօքճիւի դէմ։ Մինչ այդ Քէօքճիւի պատրաստած ամբաստանագրին մէջ ակնարկութիւններ կայ նաեւ Իսթանպուլի եւ Տրապիզոնի Ոստիկան Զօրաց պաշտօնեաներու դերակատարութեան մասին։ Մեկնելով դէպքի վայրի գործատեղիներու մօտ գտնուող տեսախցիկներու նկարահանումներէն, պարզուած են Ոստիկան Զօրաց պաշտօնեաներու դէպքի վայրին մէջ գոյութիւնը։ Ամբաստանագրի մէջ անոնց գոյութիւնը կը բացատրուի ոճրագործ Օկիւն Սամասթի օգնական-դիտորդ-հետեւող ըլլալով։ Անոնք կազմակերպութեան առումով պաշտօն ստանձնած են եւ այս պատճառաւ ալ իրենց թղթածրարը դուրս կը բերուի հարցաքննութեան թղթածրարէն։ Իսկ մնացեալ 25 պետական պաշտօնեաներու մասին փաստաթուղթերը արդէն տեղ գտած են հարցաքննութեան թղթածրարին մէջ։
Տինք ընտանիքի իրաւապաշտպան Հաքան Պաքըրճըօղլու կը յայտնէ թէ դատախազ Քէօքճիւ բծախնդրութեամբ հարցաքննեց ոճիրը ծրագրող, գործադրող տարրերը եւ այս գործողութեան մէջ պատասխանատուութիւն ունեցող պետական պաշտօնեաները։ «Թէեւ իր պատրաստած ամբաստանագրին մէջ մեր մատնանշած կարգ մը անուններ չեն հարցաքննուած, բայց մենք կատարուած ամբաստանութիւններուն փաստերով ալ ամրացուիլը տեսնելով կը կարեւորենք եւ դրական կը գտնենք Քէօքճիւի պատրաստած ամբաստանագիրը։ Դատախազի ներկայացուցած թղթածրարի մերժումը սխալ կը գտնենք եւ կը պահանջենք որ գործադրուի 25 պետական պաշտօնեաներու դատավարութիւնը»։
Պաքըրճըօղլու շարունակելով ըսաւ թէ Տինքի ոճիրի վերին կառոյցը եւ անոնց յարաբերութիւնները լուսաբանելու համար հարցաքննութիւնը պէտք է ալ աւելի խորանայ եւ աւարտին հասնի։ «Թղթածրարը յանձն առնելէն այս կողմ ազդեցիկ հարցաքննութիւն մը կատարող դատախազ Կէօքալփ Քէօքճիւի պաշտօնին շարունակուիլը մեծ կարեւորութիւն ունի» ըսաւ փաստաբան Հաքան Պաքըրճըօղլու։
