Ողջոյն համահայկական յաջողութեան
Համահայկական 6-րդ ամառնային խաղերը 13 Օգոստոսին Ազատութեան հրապարակի վրայ կայացող փակման արարողութեամբ հասաւ իր աւարտին։ Ինչպէս նախորդ հինգ խաղերը, 2015-ի խաղերն ալ դրոշմուեցան համահայկական ոգիով եւ մարզական աշխարհի յատուկ բարեկամութեան ջերմ զգացումներով։ Թերթիս թրքերէն էջերուն մէջ փոխանցուած է Թուրքիայէն եկած խումբերու մարզիչներուն տպաւորութիւնները։ Անոնցմէ իւրաքանչիւրը իր խումբի յաջողութեան կամ ձախողութեան մասին արտայայտուելէ ետք կարծես միաբերան կը խօսին ստեղծուած բարեկամական միջավայրի մասին։ Մասնակիցներուն մէջ մեծամասնութիւնը կը կազմեն առաջին անգամ համահայկական խաղերու առթիւ Հայաստան այցելողները։ Որքան խանդավառ եւ ոգեւորիչ է այդ երիտասարդութեան ապրած տրամադրութիւնը հայրենի երկրի եւ անոր ժողովուրդին նկատմամբ։ Արդարեւ մրցում բառը որքան ալ իր մէջ պարունակէ մրցակցութեան ոգին, խաղերու աւարտին տիրապետողը ոչ յաղթանակի ոգեւորութիւնն էր եւ ոչ ալ պարտութեան թախիծը։
2015-ի Համահայկական խաղերը յատկապէս ուշագրաւ էին մասնակիցներու թիւին աճով։ Լոկ մարզիկներու թիւը կը մօտենար 7 հազարի, որոնք եկած էին աշխարհի 171 տարբեր քաղաքներէ։ Հաւատալով թէ կազմակերպչական թերութիւն համարուելու արժանի բոլոր բացթողումները նշանակուած են պատկան մարմիններու տետրակներուն մէջ, մենք այս պահուն կը սիրենք ձեռք բերուած ընդհանուր յաջողութեան մասին խօսիլ։ Համահայկական խաղերու գլխաւոր նպատակը եղած է աշխարհասփիւռ հայ երիտասարդութիւնը հաղորդակից դարձնել մայրենի երկրին։ Կարելի է ըսել որ այդ նպատակը արժանաւորապէս իրականացաւ 6-րդ անգամ։
Համահայկական խաղերը Թուրքիոյ հայ հասարակութեան իրականութեան մէջ կարեւոր գործօն մըն է հայ ինքնութեան վերակերտման առումով։ Այս իմաստով խիստ նպատակայարմար եղած է Իսթանպուլի հաւագականի կողքին Տիյարպէքիրի, Սասունի, Պիթլիսի, Մուշի, Տէրսիմի, Մուսալեռան եւ Սամաթիոյ հաւաքականներու մասնակցութիւնը։ Այսպէսով Թուրքիայէն մասնակցող մարզիկներու թիւը մօտեցաւ 900-ի։ Այս ալ իր կարգին գերազանց թուանշան է, մանաւանդ յիշելով կորուսեալ կարծուած հայրենիքի մը վերածնունդը։ Խաղերու կազմակերպման զուգահեռ խիստ կարեւոր էր մասնակից խումբերու վարիչներուն նոյնինքն Հանրապետութեան նախագահի կողմէ գնահատուիլն ու մետայլներով պարգեւատրուիլը։
Կը հաւատանք թէ Համահայկական խաղերը համահայկական յաջողութիւն մը եղած է, որուն համար հայաշխարհը երախտապարտ է հիւրընկալ Հայաստանին եւ անոր բազմաբնոյթ վարիչներուն ու կազմակերպիչներուն եւ ժողովուրդին։
