Ոչ կեանքը եւ ոչ ալ մահը բաժանեց քոյր ու եղբայր Թորամանները
Քոյր ու եղբայր Տիգրան-Արտեմ Թորաման ժամերու տարբերութեամբ հրաժեշտ առին այս աշխարհէն։ Բժիշկ Տիգրան Թորաման 90 տարեկան էր, իսկ քոյրը Արտեմ 86։ Բնիկ Օրտուցի այս քոյր ու եղբայրը իրենց քաղաքի երկրորդական վարժարանը աւարտելէ ետք միայն համալսարանական ուսում ստանալու համար հեռացան իրենց բնօրրանէն։ Տիգրանը աւարտեց Իսթանպուլի համալսրանի բժշկական բաժինը, իսկ քոյրը Արտեմ դեղագործական։ Անոնք շրջանաւարտ ըլլալով վերադարձան իրենց ծննդավայրը։ Արտեմ բացաւ «Իթիմաթ» դեղարանը, որուն վերի յարկին վրայ ալ եղբայրը բժիշկ Տիգրան Թորաման սկսած էր հիւանդներ ընդունիլ։ Տիգրանը աշխատեցաւ նաեւ Օրտու քաղաքի պետական հիւանդանոցը։ 25 տարի իբրեւ բժիշկ անվճար ծառայեց «Օրտու սփոր» մարզակումբին։ Իրենց ասպարէզներուն մէջ երկուքին ալ որդեգրած սկզբունքն էր «Աղքատէն դրամ չ՚առնուիր» կարգախօսը։
Նախորդ հինգշաբթի օր բժիշկ Տիգրան Թորաման տան մէջ անհանգստացաւ։ Քոյրը իսկոյն դիմեց շտապօգնութեան, բայց արդէն բժիշկ Թորաման իր հոգին աւանդած էր։ Թաղումը կատարուեցաւ իմամի ձեռամբ Օրտուի «Չաքալչըքմազ» գերեզմանատունը։ Թաղումին մասնակցող Արտեմ Թորաման այդ օր չ՚ուզեց իր բնակարանը գիշերել եւ տեղաւորուեցաւ քաղաքի կեդրոնական հատուածի հիւրանոցներէն մէկուն։ Յաջորդ օր ան եւս անհանգստացաւ եւ փոխադրուեցաւ հիւանդանոց։ Սակայն բժշկական միջամտութիւնը արդիւնք մը չտուաւ եւ ան ալ իր մահկանացուն կնքեց ուղեղի արիւնահոսութեան հետեւանքով։
Արտեմ Թորաման եւս իմամի աղօթքներով հողին յանձնուեցաւ եղբօր շիրիմին քով։
Այս տխուր առթիւ Թուրքիոյ Հայոց Պատրիարքարանը լուսաբանութիւն մը կատարելով յայտնեց թէ իրենք տեղեակ չեն եղած այս մահերէն։ «Եթէ իմաց տրուէր Պատրիարքարանը հոգեւորական մը կ՚ուղարկէր Օրտու, թաղումը իրենց կրօնքին թելադրած կարգ ու կանոնով կատարելու համար» ըսուած է Պատրիարքական լուսաբանութեան մէջ։
Հանդիպակաց կիրակի օր Ֆերիգիւղի Սուրբ Վարդանանց Եկեղեցւոյ մէջ յաւարտ Ս. Պատարագի Հոգեհանգստեան աղօթք կատարուած է քոյր ու եղբայր Թորամաններու հոգւոյն համար։
