Վկայականներ որպէս գիտելիքի երաշխիք
Վերջերս արտակարգ յուզում մը կը տիրէ Թուրքիոյ միակ հայկական գիւղի՝ Վաքըֆլըի մէջ։ Յունուար ամսուն մեկնարկած դասընթացքը հետզհետէ կը հասնի իր աւարտին եւ մասնակիցները կը ստանան իրենց հետեւած ուսման համապատասխան վկայականներ։ Նախապէս ալ անդրադարձած էինք, թէ գիւղի մէջ կառուցուած բազմանպատակ շէնքի մէկ հատուածը պիտի գործածուէր որպէս խոհանոց, գիւղ այցելողներուն վաճառուող տնական արտադրութիւնը պատրաստելու համար։ Գիւղապետարանի նախաձեռնութեան աջակցութիւն բերաւ նաեւ Զարգացման նախարարութիւնը եւ այսպէսով կազմակերպուեցաւ խոհարարութեան դասընթացքներ։ Անշուշտ այստեղ կարեւոր դերակատարութիւն ունեցաւ ՄԱԿ-ի Մշակութային ձեռնարկներու միջազգային կազմակերպութիւն ՈՒՆԵՍՔՕ-ի Անտիոք քաղաքը համաշխարհային 26-րդ խոհանոցի քաղաք հռչակումը։ Նախագիծը կոչուած էր «Պատմութենէն փոխանցուած համեր» խորագիրով։ Իսկապէս ալ այստեղ մատուցուածները տարածաշրջանի բուսականութեան մշակումներն են, որոնք ունին բազմադարեան անցեալ։ Դասընթացքներու համակարգողն էր Լորա Պայթար Չափար եւ ուսուցիչը Սեւկի Կիւլշէն։ Գիւղի 26 կիներ շուրջ 500 ժամ հետեւեցան Կիւլշէնի ցուցմունքներուն եւ աւարտին արժանացան համապատասխան վկայագիրը ստանալու։
Նշենք, որ գիւղի աւանդական խոհանոցի արտադրութիւնը տնտեսական նպաստ կը բերէ, թէ մասնակիցներուն եւ թէ գիւղի միասնական սնտուկին։ Այժմ արդի սարքերով օժտուած նոր խոհանոցի եւ խոհարարութեան վկայագիր ստացող արտադրողներու շնորհիւ աւելի վստահելի եւ հրապուրիչ պիտի դառնայ այս արտադրութիւնը։
