Ուխտագնացութիւն դէպի Կրետէ Կղզի
Ն.Ա.Տ. Սահակ Բ. Պատրիարք Հայրը, որ հովուապետական այցելութեամբ կը գտնուի Յունաստանի Կրետէ Կղզին, 20 Յունիս 2024, Հինգշաբթի, այցելեց Արքատիի յունական վանքը։
Մեր Հոգեւոր Պետը, ընկերակցութեամբ Կրետէի Հայոց Հոգեւոր Տեսուչ Գերշ. Տ. Եզնիկ Արքեպս. Պետրոսեանի, գաւազանակիր Հոգշ. Տ. Գասպար Աբղ. Կարապետեանի եւ Արժ. Տ. Տրդատ Աւ. Քհնյ. Ուզունեանի, այցելեց վանք, որու մուտքին դիմաւորուեցաւ Ռեթիմնոյի Գերշ. Տ. Փրոտրոմոս Մետրոպոլիտի եւ վանական միաբաններու կողմէ։
Այստեղ կատարուեցաւ ուխտի աղօթք։ Բարի գալստեան խօսքէ ետք, միաբաններէն մէկը Ամենապատիւ Սրբազան Հիւրին ու ընկերակիցներուն տեղեկութիւններ տուաւ Վանքի մասին։ Ապա Նորին Ամենապատուութիւնը այցելեց նաեւ վանքի թանգարանը։
Ընդունելութեան սրահի մէջ տեղի ունեցած նուէրներու փոխանակումէն ետք, վանքի սեղանատան մէջ սարքուեցաւ սիրոյ սեղան, ի պատիւ Պոլսոյ Հայոց Ամեն. Ս. Պատրիարք Հօր։
Ճաշէն ետք Նորին Ամենապատուութիւնն ու ընկերակիցները վերադարձան հիւրանոց։
Ուխտի այց դէպի Այիա Թրիատա Վանք
Սրբազան Պատրիարք Հայրը, Կրետի ուխտագնացութեան ծիրէն ներս, 21 Յունիս, Ուրբաթ օր ալ այցելեց պատմական Ս. Երրրորդութիւն յունական վանքը։
Մեր Հոգեւոր Պետը եւ իրեն ընկերակցող հայ հոգեւորականաց խումբը Վանքի մուտքին դիմաւորուեցան Յանիայի Գերշ. Տ. Դամասկինոս Մետրոպոլիտի եւ վանական միաբաններու կողմէ։
Յանիա Կրետէ Կղզիի երկրորդ մեծ քաղաքն է, որ միշտ կը մրցի մայրաքաղաք Հերաքլիոնի հետ։
Այստեղ կատարուեցաւ ուխտի աղօթք։ Բարի գալստեան խօսքէ ետք, միաբաններէն մէկը Ամենապատիւ Սրբազան Հիւրին ու ընկերակիցներուն տեղեկութիւններ տուաւ վանքի մասին։ Ապա Նորին Ամենապատուութիւնը այցելեց նաեւ վանքի թանգարանը, ուր կը ցուցադրուէին եկեղեցական հին, զգեստներ, ձեռագիր ու հնատիպ մատեաններ, սրբանկարներ եւ այլ գոյքեր։
Ընդունելութեան դահլիճի մէջ տեղի ունեցած զրոյցէ եւ նուէրներու փոխանակումէ ետք Նորին Ամենապատուութիւնն ու ընկերակիցները վերադարձան հիւրանոց։
