Դէպի բախտորոշ ընտրութիւն
Հասած է ճակատագրական ընտրութեան թուականը։ Թուրքիա Կիրակի, 1 Նոյեմբերին անգամ մը եւս կ՚երթայ ընտրութեան, ճշդելու համար Խորհրդարանի նոր կազմը։ Տասը տոկոսի պատնէշի բերմամբ երկար տարիներէ ի վեր միայն երեք կուսակցութիւններ կրնային մուտք գործել Խորհրդարան։ Այսպէսով ձայներու մեծամասնութիւնը ստանձնող ԱՔՓ դիւրաւ կը յաջողէր կառավարութիւն կազմելու համար հարկ եղած թիւով երեսփոխաններ ունենալ։ Առաջին անգամ 7 Յունիս 2015-ի ընտրութիւններուն ՀՏՓ յաղթահարեց այդ պատնէշը եւ 80 պատգամաւորներով Խորհրդարան մտնելով, արգելք եղաւ ԱՔՓ-ի առանձին կառավարութիւն կազմելուն։ Այդ եղաւ հիմնական պատճառը, որ Նախագահ Էրտողան ձգձգեց կառավարութիւն կազմելու փորձերը եւ երկիրը տարաւ կանխահաս ընտրութեան։ Անցնող քանի մը ամիսները բաւական խոր վէրքեր բացին երկրի ընկերային կեանքին մէջ։ Բոլոր պետական հաստատութիւնները լծուեցան իշխող կուսակցութեան քարոզչութեան գործին։ Ռատիոյի եւ Հեռուստացոյցի Վերին Խորհուրդ (RTÜK)ի անդամ Էրսին Էօնկէլ յայտարարեց թէ պետական հեռուստակայանը (TRT) վերջին 25 օրերու ընթացքին 30 ժամեր տրամադրած է ԱՔՓ-ի, 29 ժամէր Նախագահ Էրտողանի, 5 ժամեր ՃՀՓ-ի, 1 ժամ 10 վայրկեան ՄՀՓ-ի եւ միայն 18 վայրկեան ՀՏՓ-ի լուրերուն։ Միայն այս ցանկը անգամ կը պարզէ թէ կուսակցութիւնները ինչ տեսակ անհաւասարութեան մէջ կը մասնակցին ընտրութեան։
Կողմնակցութիւնները ստուեր կը թողուն ընտրութիւններու օրինականութեան վրայ։ Հասարակութեան մօտ լուրջ մտահոգութիւն կայ ընտրութիւններու խարդախուելու հաւանականութեան մասին։ Այդ իսկ պատճառաւ վերջին տարիներուն հրապարակ իջած է «Քուէ եւ Աւելին» հասարակական կազմակերպութիւնը, որ կը փորձէ կամաւոր դիտորդներու միջոցաւ կանխել ընտրութեան սնտուկներու վրայ կատարուելիք հաւանական խարդախութիւնները։ 43 քաղաքներու մէջ 55 հազար կամաւորներ դիմում կատարած են դիտորդի պաշտօն ստանձնելու համար։ Կ՚ակնկալուի թէ մինչեւ ընտրութեան օրը այդ թիւը կը հասնի 60 հազարի։
Միւս կողմէ քաղաքական վերլուծաբաններ կ՚ակնկալեն թէ ընտրութեան արդիւնքը շատ տարբեր պիտի չըլլայ նախորդէն։ Այս ալ համատարած մտահոգութիւն կ՚առաջացնէ ժողովուրդին մօտ, խորհելով թէ Նախագահ Էրտողան ռազմատենջ քայլերու կրնայ ձեռնարկել։
