Դէպի ժողովրդավարութեան յատակը
Իսթանպուլի քաղաքապետ Էքրեմ Իմամօղլուի նախագահական թեկնածութեան յստակացումէն այս կողմ, իշխանութեան շրջանակներէն եկող դաւադրութիւնները հասան իրենց գագաթնակէտին։ Բոլորին ծանօթ իրողութիւն է թէ Էքրեմ Իմամօղլու Էրտողանի իշխանութեան դէմ մղած բոլոր պայքարներէն յաղթանակով դուրս եկաւ։ Հարցախոյզները կը վկայեն թէ նախագահական ընտրութեան մը յաղթողը եւս ինք պիտի ըլլայ։ Հաւանական պարտութիւնը վերացնելու միտումով զանազան դատեր յարուցուեցան իր դէմ, ուր տարբեր պատիժներու կողքին կը պահանջուէր նաեւ քաղաքականութեան արգիլումը։ Բոլորն ալ արհեստական կերպով հնարուած մեղադրանքներով լեցուն այդ դատերը բաւարար չեղան Իմամօղլուի երթը կասեցնելու։ Ստեղծուեցաւ նոր պատրուակ մը, որ վիճելի պիտի դարձնէր անոր համալսարանի վկայականը։ Այս նիւթով ալ բազում ճնշումներ գործադրուեցան, որոնց հետեւանքով համալսարանի պատկան բաժնի տեսուչը հարկադրուեցաւ հրաժարման։ Այս անգամ Իսթանպուլի Համալսարանի խորհուրդն է որ 28 այլ շրջանաւարտներու հետ միասին չեղեալ համարեց նաեւ Էքրեմ Իմամօղլուի վկայականը։
Թուրքիոյ վարչական կանոնագրի համաձայն նախագահի թեկնածու ըլլալու համար անհրաժեշտ է համալսարանի վկայականը։ Հետեւաբար Իսթանպուլի Համալսարանի Խորհուրդի այդ որոշումը արդէն բաւարար էր Իմամօղլուն մրցումէն դուրս բերելու համար։
Սակայն այս որոշումը ինք չեղեալ կրնար համարուիլ դատական հակառակ ուղղութեամբ վճիռով մը։ Ուրեմն աւելիին կարիք կար։
Այդ աւելին եկաւ 19 Մարտ Չորեքշաբթի առաւօտուան կանուխ ժամերուն։ Բազմահարիւր ոստիկաններ պաշարեցին Իմամօղլուի բնակարանը եւ բերման ենթարկեցին զինք։
Նոյն ժամերուն բերման ենթարկուեցան նաեւ Շիշլիի եւ Պէյլիքտիւզիւի քաղաքապետները։ Անոնց հետ միասին բերման ենթարկուեցան քաղաքապետարանի աշխատակազմէն աւելի քան հարիւր անձեր։
Անակնկալ այս զարգացումը բնականաբար ունեցաւ տարբեր բնոյթի հետեւանքներ։ Իսթանպուլի սակարանը ահռելի անկում ունեցաւ։ Եւրոյի եւ ԱՄՆ տոլարի նման տարադրամներ մրցանշային աճ արձանագրեցին։ Մէկ օր առաջ 40 ԹԼ հաշուող Եւրոն գերազանցեց 45-ի սահմանները եւ հազիւ ժամեր անց նահանջեց դէպի 42 ԹԼ.։
Համարեա բոլոր քաղաքական կուսակցութիւնները շատ բուռն կերպով հակազդեցին Իմամօղլուի դէմ գործադրուած անարդարութեան։
Ժողովրդահանրապետական կուսակցութեան պետ Էօզկիւր Էօզէլ կատարուածը պետական հարուած ըլլալով բնութագրեց եւ յայտնեց թէ մտադիր չեն դոյզն իսկ ետքայլ ընելու։
Նշենք թէ քաղաքապետ Իմամօղլուի ուղղուած մեղադրանքներու շարքէն կ՚ակնարկուի նաեւ ահաբեկչական կազմակերպութիւնը ղեկավարելու յանցանքը։ Այս տեսակի մեղադրանքի պարագային Ներքին Գործոց Նախարարութիւնը իրաւասու կը դառնայ զինք պաշտօնանկ ընելու եւ իր տեղ տեղապահ մը նշանակելու։
Իշխանութիւնները մէկ կողմէ ալ կանխամիջոցներ կը որոնեն բողոքի զանգուածային ցոյցերու դէմ։ Մեթրոյի Թաքսիմի կայարանը արգելափակուած է։ Նոյնպէս Անվտանգութեան ծառայութեան կեդրոնական շէնքի յարակից բոլոր փողոցները եւ Վաթան պողոտան դարձեալ փակ է երթեւեկութեան։ Դատական գործընթացի հետ առնչուած լուրերու շրջանառութիւնն ալ արգիլուած է դատախազութեան պահանջով։
Էօզկիւր Էօզէլ փոխած է իր ընթացիկ ծրագիրները եւ իր հետ ունենալով կուսակցութեան նախկին պետ Քըլըչտարօղլուն, ուղղուած է դէպի Իսթանպուլ։
Միւս կողմէ Անգարայի քաղաքապետ Մանսուր Եավաշ յայտարարած է թէ կ՚առկախէ նախագահութեան իր թեկնածութիւնը։ Անցեալին ան ըսելով թէ տակաւին երկար ժամանակ կայ եւ ինք պաշտօն ստանձնած է մայրաքաղաքի բնակիչներուն ծառայելու համար, չէր մասնակցած նախագահական թեկնածութեան բանավէճերուն։ Սակայն չէր բացառած նաեւ որ պայմաններու համաձայն ինք եւս կրնայ թեկնածութիւն առաջադրել։ Հիմա այդ վարկածը կը մերժէ եւ կ՚ըսէ թէ ինք առիթ որսացող պատեհապաշտ մը չէ։
Իսթանպուլի Համալսարանի ուսանողները ճեղքելով ոստիկանական պատնէշը, հաւաքուեցան պատմական դարպասի առջեւ եւ Եըլտըզ, Պողազիչի ու Իսթանպուլ Թեքնիք Համալսարաններու ուսանողներու ալ մասնակցութեամբ հանրահաւաք կատարեցին։ Յայտնի է որ ծաւալող անօրէնութիւնը փլած է վախի հոգեբանութիւնը եւ համալսարանականներ երկար տարիներ ետք կրկին փողոց իջած։
Զարգացումները արձագանգ գտան նաեւ օտար երկիրներու մէջ ալ։ Արդարեւ Հայաստանի լրատուամիջոցներ կը դիմեն «Ակօս»ի խմբագրութիւն, պատահածներու մասին լուսաբանութիւն պահանջելով։
Նախագահական թեկնածուի մը դէմ գործադրուած այս արգելքները հարցականի տակ կը դնեն երկրի օրինականութիւնը եւ ժողովրդավարութիւնը։ Վաղուց անցած ենք «Ալ այսքանն ալ չըլլար» առարկութեան նշացողը։ Այլեւս ոչ ոք կրնայ ենթադրել թէ տակաւին ինչեր ու ինչեր կրնան ըլլալ, յարատեւ պահելու համար գործող իշխանութիւնը։
