Թարգմանչաց տօնը կը յուշէ պատասխանատւութեան գիտակցութիւն
.jpg)
Ինչպէս նախորդ տարիներ, այս տարի ալ Թարգմանչաց վարդապետներու յիշատակման ձօնուած շաբաթը յատուկ եռուզեռ ստեղծած է քաղաքիս հայ վարժարաններու մէջ։
Այս ծիրէն ներս 15 Հոկտեմբեր չորեքշաբթի խմբագրատան շէնքին մէջ հաճոյքը վայելեցինք Ֆերիքիւղի Մերամեթճեան Վարժարանի աշակերտութեան տուած այցելութեան։ Անոնք դիմաւորուեցան հայերն էջերու խմբագիր Բագրատ Էսդուգեանի կողմէ։ Ստացան բովանդակալից տեղեկութիւններ նախ եւ առաջ «Ակօս»ի եւ Հրանդ Տինք Հիմնարկի կողմէ շահագործուող երբեմնի Անարատ Յղութիւն դպրոցի շէնքի մասին։ Էսդուգեան պատմեց թէ դպրոցը աշակերտի նուազումի պատճառով իր առաքելութիւնը դադրեցնելէ շուրջ տասնամեակ մը ետք ո՞ր պայմաններով վարձակալուած է Հրանդ Տինք Հիմնարկի եւ «Ակօս»ի կողմէ։
Ապա նիւթը հասաւ մայրենի լեզուի կարեւորութեան, քանի որ նշուեցաւ թէ աշխարհի վրայ խօսուող լեզուները կը նկարագրուին հազարներով, իսկ գործածուող տառատեսակները տասնեակներով։ Այսպէս աշխարհի վրայ գոյութիւն ունի ընդամէնը 28 այբուբեններ, որոնցմէ մէկն է Մեսրոպեան երկաթագիրը։ Թերեւս այս հարստութեան իբր երախտիք, միայն հայ ժողովուրդն է, որ ունի Թարգմանչաց Տօն։
Էսդուգեան մայրենիի կարեւորութիւնը նշելու կողքին աշակերտութեան կոչ ուղղեց իրենց ապրած ժամանակաշրջանի հանդէպ ուշադրութեան եւ պատասխանատւութեան գիտակցութիւն։ Ան յիշեցուց Շուէտացի կլիմայի խնդիրներու գործիչ Կրեթէ Թունպերկի օրինակը, որ համարեա իրենց տարեկից էր, երբ ստեղծեց դասերը պոյքոթելով բողոքներ կատարելու ընթացքը։
«Մեր խմած ջրի, մեր կերած հացի հանդէպ իսկ պատասխանատւութիւն պէտք է ունենանք։ Այն ինչ որ կը վայելենք, անսպառ աղբիւրէ մը չի հոսիր։ Մարդիկ գիտեն քարիւղի նիւթական արժէքը։ Բայց չեն գիտեր այն պարզ իրողութիւնը, որ քարիւղը խմել կարելի չէ։ Եթէ այսօր պատերազմներ կը մղուին քարիւղի տիրանալու համար, եթէ չկանխենք մօտ ապագային այդ նոյն կամ նոյնիսկ աւելի թէժ պատերազմները պիտի կայանան ըմպելի ջուրի հասնելու համար» եզրակացուց Էսդուգեան։
