Թատերական եռուզեռ պոլսահայ բեմերու վրայ
Մխիթարեան Վարժարանի հիմնադրութեան 200 ամեակի առթիւ կազմակերպուած թատերական ներկայացման երկրորդ բեմադրութիւնը 25 Հոկտեմբերին կայացած էր Տատեան Վարժարանի սրահին մէջ։ Նոյն խաղի երրորդ բեմադրութիւնն ալ տեղի ունեցաւ 28 Հոկտեմբերին, Գատըգիւղ թաղը, Արամեան Սանուց Միութեան երդիքին տակ։ Ներկաները առիթը ունեցան վայելելու Ռոպէր Հատտէճեանի «Մահը ա՞յս է արդեօք» թատերախաղը, որուն բեմադրիչն ու դերասանուհին էր նախկին արամեանցի, այժմ ֆրանսաբնակ Պէրթա Կիւվէն։
Խաղի աւարտին Պէրթա Կիւվէն եւ Ա.Զ.Ա.Տ. Թատերախումբի անդամները յոտնկայս ծափահարուեցան հանդիսատեսի կողմէ։
Ներկայացման աւարտին Ա.Ս.Մ. ատենապետ Սեւան Աթաօղլու ելոյթ ունենալով նախ առողջութիւն մաղթեց թատրերգութեան հեղինակ՝ Ռոպէր Հատտէճեանին, շնորհաւորեց դերասանները եւ շնորհակալութիւն յայտնեց բոլոր դերակատարներուն, այս եզակի ապրումին իրենց բերած մասնակցութեան համար։
Մխիթարեան Միաբանութեան 200 ամեակին առթիւ նոյնանուն միութեան կողմէ կազմակերպուած այս ձեռնարկին համար Արամեան Սանուց Միութեան անունով «Կենաց Ծառ» կանանց ձեռագործերու աշխատանոցին կողմէ պատրաստուած յուշանուէրներ յանձնուեցան Արսէն Քովանին եւ Պէրթա Կիւվէնին։
