Դատաւորը՝ «Ի՞նչ է այս խայտառակ նկարներու նպատակը»
ՈՒՅԿԱՐ ԿԻՒԼԹԵՔԻՆ
Հրանդ Տինքի ոճիրի դատավարութիւնը տակաւին կը շարունակուի Իսթանպուլի 14-րդ Եղեռնադատ Ատեանի մէջ։ 86 ամբաստանեալներով շարունակուող դատի այս շաբաթուայ նիստերուն քննարկուեցաւ ոճրագործ Օկիւն Սամասթի ձերբակալութեան պահուն Սամսունի մէջ տեղւոյն ոստիկաններու եւ ոստիկան զօրաց պաշտօնեաներու հետ թրքական դրօշակ մը պարզելով նկարուելու դէպքը։ Այդ լուսանկարի մէջ երեւացողները եւ լուսանկարը մամուլին փոխանցողները կը մեղադրուին հասարակութեան մօտ տպաւորութիւն գոյացնելու մեղադրանքով։ Այս շրջանակով Սամսունի Ոստիկան Զօրաց Հրամանատարութեան լրաքաղութեան բաժնի պաշտօնեաներէն Պիւրոլ Ուստաօղլու մանրամասնութիւններ փոխանցեց ձերբակալման պահուն մասին։ «Մեր քաղած տեղեկութիւններու հիման վրայ Սամսունի աւթօկայանին մէջ սկսանք սպասել այն աւթօպիւսը, որուն հետ պէտք է գար Օկիւն Սամասթ։ Մեր պաշտօնակիցները զինք ձերբակալեցին եւ աւթօկայարանի ոստիկանատունը առաջնորդեցին։ Մսած կ՚երեւէր փորձեցի զինք հանգստացնել, ըսելով թէ այստեղ իրեն վտանգ մը չի սպառնար։ Սոված էր, թոսթ եւ թէյ ապսպրեցի։ Խոստացաւ յայտ ներկայացնել։ Զինք խուզարկեցինք եւ իր վրայ դրօշակ մը գտանք։ -եթէ դրօշակս առնէք բառ մը իսկ չեմ խօսիր- ըսաւ։ Այդ պայմաններու տակ դատախազը յօժարեցաւ դրօշակը իրեն վերադարձնել պայմանաւ որ ան ալ պատասխանէ ուղղուած հարցումներուն»։
Ուստաօղլու ապա բացատրութիւններ տուաւ նկարահանումի ինչ պայմաններուն տակ կատարուելուն մասին։ Իր բացատրութիւնները ջղայնացուց դատակազմի պետը, որ յանդիմանելով ըսաւ թէ, ո՞ր իրաւասութեամբ հարցաքննութիւն կատարեցիք։ «Այդպէս լիազօրութիւն մը չունէիք, ինչո՞ւ համար անմիջապէս ձերբակալել եւ Իսթանպուլ ղրկելու փոխարէն այս խայտառակ նկարները քաշուեցաք եւ վերջն ալ մամուլին փոխանցեցիք»։ Ուստաօղլու այս յանդիմանութիւններու դէմ յայտնեց թէ ամէն ինչ կատարուած է դատախազի ցուցմունքներով։
