Դատական անսպառ օրակարգ
7Յուլիս երեքշաբթի օր Իսթանպուլի 14-րդ Եղեռնադատ Ատեանի մէջ շարունակուեցաւ Հրանդ Տինքի դատավարութեան եռօրեայ նիստը։ Երեքշաբթի օր դատարանը լսեց անցեալին «Ֆօքս» հեռուստակայանի աշխատակից Սոնէր Տապաղի եւ Իսթանպուլի Ոստիկան Զօրաց հրամանատարութենէն Ալի Օքուրի վկայութիւնները։ Դատարանը մերժեց Տինք ընտանիքի փաստաբանի կողմէ պահանջուած Ազգային Լրաքաղութեան Կազմակերպութեան (MİT) պաշտօնեաներուն Հ. Քուպիլայ Կիւնայ, Էօզել Եըլմազ եւ Հանտան Սելչուքի դատարան ներկայանալով բացատրութիւն տալու պահանջը։ Դատարանը նախապէս այս մասին Ազգային Լրաքաղութեան կազմակերպութեան դիմում կատարած էր, բայց այդ դիմումը անպատասխան մնացած։ Այս նիստին փաստաբան Հաքան Պաքըրճըօղլու կրկնեց իր պահանջը, որ մերժուեցաւ դատակազմին կողմէ Դատակազմը սակայն յօժարութիւն յայտնեց ոճիրի թուականին կազմակերպութեան Իսթանպուլի Շրջանային Տնօրէն Ահմետ Քէօքսոյի վկայութիւնը լսելու համար դարձեալ դիմում կատարելու մասին։
Մինչ այդ Հրանդ Տինքի ոճիրը քննարկող դատակազմի պետը հինգերորդ անգամ է որ կը փոխուի։ 7-8 եւ 9 Յուլիսի նիստերուն կը նախագահէ Աքըն Կիւրլեք։
Վիճելի դատավճիռ
Միւս կողմէ երեք տարի առաջ Մեծ Կղզիի մէջ կայացած սովորական ժողովի մը մասնակիցները բերման ենթարկուած եւ ապա ձերբակալուած էին գաղտնի ժողով գումարելու մեղադրանքով։ Իրականութեան մէջ կատարուածը մարդու իրաւունքներու պաշտպանութեամբ զբաղուող հասարակական կազմակերպութիւններու խորհրդակցական մէկ հանդիպումն էր միայն։ Դէպքը իշխանամետ մամուլի կողմէ հասարակութեան ներկայացուեցաւ որպէս գաղտնի կազմակերպութիւններու ընդհատակեայ աշխատութիւն։ Շարունակուող դատավարութիւնը աւարտին հասաւ Թանէր Քըլըչի «կազմակերպութեան անդամակցութեան» մեղադրանքով 6 տարի 3 ամիս, Էօզլեմ Տալքըրան, Իտիլ Էսեր եւ Կիւնալ Քուրշունին ալ «կազմակերպութեան օգնել»ու մեղադրանքով 2 տարի մէկ ամիս բանտարկութեան վճիռով։ Մնացեալ մեղադրեալները անպարտ հռչակուեցան։
Յերիւրածոյ եւ անհիմն պնդումներով կայացած այս վճիռը ընդվզում պատճառեց մարդու իրաւունքներու պաշտպաններու շրջանակներէն ներս։ Մանաւանդ ծիծաղելի գտնուեցաւ այն վարկածը, ըստ որու հասարակական գործիչները կը մեղադրուէին իրարու հետ բոլորովին հակասող չորս տարբեր ահաբեկչական կազմակերպութեան անդամակցութեամբ։
