Շնորհանդէս Տոք. Հրայր Ճեպեճեանի Գ. Հատորին
ԱՂԱՒՆԻ ՄՈՒԹԱՖԵԱՆ
23Նոյեմբեր շաբաթ յետմիջօրէին Սուրբ Երրորդութիւն Եկեղեցւոյ Նարեկեան սրահին մէջ կայացաւ Հրայր Ճեպեճեանի «Հայկական Ազգագրական Պատկերներ՝ տեսիլք, կամք եւ յոյս» անուն գիրքի շնորհանդէսը։
Միջոցառման ներկայ էին Սահակ Բ. Պատրիարքը, Հայ Աւետարանչական Եկեղեցւոյ պետ Վերապատուելի Գրիգոր Աղապալօղլու, Հայ Կաթողիկէ Առաջնորդարանի ներկայացուցիչ Տէր Վարդան Հայր Սուրբ, Կրետէ Կղզիի Հոգեւոր Հովիւ Տէր Եզնիկ Արք. Եպիսկոպոս, Սուրբ Երրորդութիւն Եկեղեցւոյ Հոգեւոր Հովիւ Տէր Յարութիւն Վարդապետ եւ քահանայից դասը։
Շնորհանդէսը սկսաւ Յարութիւն Վարդապետի ողջոյնի խօսքով։ Ապա Տէր Եզնիկ Արք. Եպիսկոպոս Պետրոսեան արտայայտուեցաւ իր վաղեմի բարեկամին Տոքթ. Ճեպեճեանին հոգեւոր ու գրական վաստակին։
Այս ելոյթէն ետք բարձրախօսը յանձնուեցաւ «Ժամանակ» օրաթերթի խմբագրապետ Արա Գօչունեանին։ Գօչունեան իր կարգին անդրադարձաւ Հրայր Ճեպեճեանի յօդուածներու բովանդակութեան, այդ ամբողջը նկատելով տեսակ մը ժամանակագրական վկայութիւն հայ աշխարհի ներկայ խնդիրներու մասին։
«Ակօս»ի հայերէն էջերու խմբագիր Բագրատ Էսդուգեան ալ վեր առաւ Ճեպեճեանի մտաւորական դիմագիծը, որ կը ցոլանայ իր գրութիւններուն ընդմէջ։ Ան ողջունեց այս հատորը, որ կու գայ երրորդ անգամ միանալու նման բնոյթի նախորդ երկու գիրքերուն։ Էսդուգեան օրուայ թելադրանքը որպէս՝ անդրադարձաւ նաեւ Գարեգին Արք. Պէքճեանի մահուան՝ դիտել տալով թէ անոր տեղապահ ընտրուելու օր յաղթական կշռոյթով չէին ղօղանջած Աթոռանիստ Եկեղեցւոյ զանգակները, բայց հիմա ամբողջ հոգեւորական դասու ներկայութեամբ պիտի ղօղանջեն սուգի կշռոյթով։
Այս ելոյթներէ ետք Էսաեան Վարժարանի հայերէն ուսուցիչ Արփէն Չընար եւ Նատին Պերպերեան միասնաբար զրուցեցին հեղինակին հետ, անոր ուղղելով դիպուկ հարցումներ, որոնք քաղուած էին այս երրորդ հատորի բովանդակութենէն։ Երկու երիտասարդ ուսուցիչները հանդիսատեսի գնահատանքին արժանացան թէ՛ իրենց սահուն ու առինքնող հայերէնով եւ թէ խորաթափանց կերպով պատրաստած հարցումներով։
Յաջորդին մեկնարկեց միջոցառման երաժշտական բաժինը, որուն մեկնակէտը հանդիսացաւ Մարալ Այվազ Չաղլըչուպուքչույի Բարսեղ Կանաչեանի հանրածանօթ «Օրօր»ի կատարումը, իր որդւոյն Պարէդ Չաղլըչուպուքչուի դաշնամուրի ընկերակցութեամբ։ Իսկապէս տպաւորիչ էր մայր ու որդիի պարզած պատկերը բեմին վրայ։ Իսկ Մարալ Այվազ Չաղլըչուպուքչու անգամ մը եւս կը փաստէր իր կարողութիւնը այդքան քնքուշ կերպով կատարելով հանրածանօթ օրօրոցայինը։
Սերճան Կազերօղլու եւս իր կուռ ձայնով տպաւորեց հանդիսատեսը երբ կը կատարէր Տիգրան Չուխաճեանի «Լեպլեպիճի» օփէրայէն ծանօթ «Մենք քաջ տոհմի զաւակներ ենք» երգով, դարձեալ Պարէդ Չաղլըչուպուքչուի դաշնամուրի ընկերակցութեամբ։
Լուսաւորիչ Դպրաց Դաս Երգչախումբը իր ամբողջական կազմով բեմ բարձրացաւ խմբավար Յակոբ Մամիկոնեանի գլխաւորութեամբ։ Խումբը երկիւղածութեամբ ներկայացուց երեք գործեր՝ Մակար Եկմալեանէ «Սուրբ», Գուրգէն Ալէմշահէն «Հունձք» եւ Ռուբէն Ալթունեանէ «Օրհներգ»։
Միջոցառումը աւարտեցաւ Պատրիարք Հօր հուսկ բանքով ու երգչախումբի կատարած«Տէրունական Աղօթք»ով։
Վստահ ենք թէ այս շնորհանդէսը խոր տպաւորութիւն գոյացուց Նարեկեան սրահ փութացող մշակութասէր զանգուածին եւ յատկապէս ալ իսթանպուլահայ համայնքը միշտ բարձր գնահատած Տոքթ. Հրայր Ճեպեճեանի մօտ։
