«Սար» երաժշտա-պարային ներկայացումը կը կրկնուի
Որպէս «Փոկոտներ»ու պարային ընկերութեան նախաձեռնութիւնը, Միհրան Թոմասեան եւ Սարօ Ուստայի հեղինակած «Սար»ը կրկին կը ներկայանայ հանդիսատեսին։ Բեմադրութիւնը առաջին անգամ ներկայացուած էր 2015 թուին։
Միհրան Թոմասեան եւ Սարօ Ուստա նոյն թաղի մէջ հասակ առած, նոյն վարժարանը աւարտած եւ նոյն մշակոյթէն բաժին քաղած երկու ընկերներ են։ Անոնց միասնաբար ստեղծագործած երաժշտութեան եւ պարի բեմադրութիւնը հիւսուած է հասարակած ինքնութեան յուշերէն, ուր շարժումը, թուղթը եւ երաժշտութիւնը օգտագործելով կը փորձեն պատմել լեռնային հէքեաթ մը, որ այնքան ալ օտար չէ հանդիսատեսին։
Բեմադրութիւնը կը նկարագրուի հետեւեալ տողերով՝ «Ընտրեցիր նորատունկդ, որոշեցիր վայրը, պատրաստեցիր հողը, տնկեցիր ու կենաց ջուրը տուիր ու ապա կռնակդ դարձար հեռացար։ Օրեր անցան, թերեւս շաբաթներ, անձրեւներ տեղաց ու նաեւ ձիւն, քամիներ անցան ու եկար տեսար որ հասակը հասակիդ հաւասարած է։ Բռնած էր նորատունկը։ Արմատի մազմզուքը կրնար անհուն երկարիլ։ Ապա գարուն եղաւ, յաջորդեց ամառը։ Արեւը ծագեցաւ, լուսինը մայրը մտաւ, Արուսեակը յայտնուեցաւ։ Դուն արդէն մեռած էիր, թոռներդ ո՞վ գիտէ ո՞ւր արթնցան։ Գացողներ եղան, եկողները ուրիշ գացողներ էին, չեղաւ, բաներ մը սխալ ընթացան, ծառը աճեցաւ հեռուի տունը մէկ էր երեք եղաւ, հինգ էր հինգհարիւր եղաւ, շուքին տակ սպանուողներ եւ անշուշտ համբուրուողներ եղան։ Անտեսողներ եւ ջուր տուողներ…
Ապա հատեցին ծառը։
Լաւ եղաւ, մայթը կը նեղցնէր։
Այս ներկայացումը հիւսուած է աշխարհը, մարդկութիւնը, լեռները, երկիրը ու երկինքը սխալ ընկալելու հիման վրայ։ Վերեւ նշուած ծառին հետ առնչութիւն մը չունի։ Թոռներուն ուր արթննալով մտահոգուած է»։
«Սար»ի ներկայացումը կ՚իրականանայ 22 Մայիս ժամը 20.30-ին Գատըգիւղի «Մօտա Սահնէսի» թատրոնի մէջ, ներկայացման տոմսերը կարելի է հայթայթել www.modasahnesi.com/events/sar/ կայքէջի միջոցաւ։
