Ս. Գրիգոր Լուսաւորիչ Շաբաթօրեայ Վարժարանը Տօնեց Տրնդեզը
«Երթայ Ձմեռը, գայ Գարունը, երթայ Հինը, գայ Նորը, երթայ Չարը ու գայ՝ Բարին... Թող զարնէ դհոլը ու փչէ զուռնան»։ Տնօրէն Նորայր Տատուրեանի այս խօսքերով սկսաւ Փասատենա քաղաքի Ս. Գրիգոր Լուսաւորիչ շաբաթօրեայ վարժարանի Տրնդեզի աւանդական խարոյկահանդէսը։
15 Փետրուար Շաբաթ օր տրամադրութիւնը տօնական էր շաբաթօրեայ վարժարանի մէջ։ Բակի մէջ թէ՛ աշակերտներու եւ թէ՝ ծնողներու մէջ կար գարնանամուտի այս զուարճանքի ժպտադէմ ակնկալութիւն։ Տօնակատարութեան մասնակցութիւն բերած էին նաեւ բազմաթիւ մեծ հայրեր ու մեծ մայրեր։
Ապա բոցավառեցաւ հանդէսը երբ սկսաւ հնչել ազգային երգերու աշխոյժ եւ մեծաձայն երաժշտութիւնը, շնորհիւ հայրենի երեք երաժիշտներու։ Ու անմիջապէս տաքարիւն աշակերտներու առաջին խումբ մը, աւելի համարձակները, սկսան կրակին վրայէն թռչիլ։ Աւելի փոքրիկները, ո՛չ նուազ խիզախ, ուսուցչուհիներու ձեռքէն բռնած վայելեցին նոյն «վտանգաւոր» հաճոյքը։ Ապա ամբողջ դպրոցը պարեց լոյսի, յոյսի եւ սիրոյ մեծ շուրջպարը։
