«Բոլորին կը պատկանիմ, կամ ոչ ոքի»
Պոլսահայ անուանի գեղանկարիչ Գրիգոր Սահակօղլու կը պատրաստուի նոր ցուցահանդէսով մը արուեստասէր հասարակութեան ներկայանալու։
Արուեստագէտը այս ցուցահանդէսի համար յղացած է «Բոլորին կը պատկանիմ, կամ ոչ ոքի» խորագիրը։
Ծանօթագրութեան մէջ կը նշուի պատմահայր Հոմերոսէն անեկդոտ մը։ Ան երբ կը շրջագայէր Եգէականի ափերուն, կը փորձէ շուքը վայելել ձիթէնիի մը։ Յանկարծ ծառը լեզուի կու գայ ու կ՚ըսէ. «Հոս էի քեզմէ առաջ եւ քեզմէ վերջ ալ հոս պիտի մնամ»։ Ի՞նչ է մարդուն նշանակութիւնը երկրի վրայ եւ իր ապրած ժամանակահատուածի մէջ։ Խորհուրդ մը՝ որ անխուսափելիօրէն կը կառչի յատկապէս ստեղծագործ մարդու մտքին։ Կը գիտակցինք կեանքի վաղանցիկութեան։ Միւս կողմէ կը տեսնենք իրենց գործով դարերը յաղթահարած կերպարներ։ Ուրեմն բնական է մտմտալ թէ արդեօք ի՞նչ յիշատակ կը մնայ մեզմէ, երբ մենք արդէն չկանք։
Բնանկարներ, դիմանկարներ, մեռեալ բնութիւն նկարողներու համար կարծես աւելի յստակ առեղծուած մըն է այս, բաղդատմամբ վերացական նիւթերով իր ներքնաշխարհը կտաւին վրայ ցոլացնող արուեստագէտի։
Նոր ցուցահանդէսը բոլոր հետեւորդներու դիմաց պիտի բանայ այս ու նման միտքերու նոր հորիզոն մը։ Իսկ այդ հորիզոնը ուրախ տրամադրութիւն թէ ոչ թախիծ պիտի պատճառէ, այս մէկը պիտի մնայ բոլորովին անհատական։
Ուրեմն արուեստագէտը մեզ կը հրաւիրէ առերեսման նոր հարթակի մը, որ նշանակութիւն պիտի ունենայ թէ ուղղակի իրեն եւ թէ ցուցահանդէսի այցելուներուն համար։
Նկատի ունենալով Գրիգոր Սահակօղլուի նախորդ ցուցահանդէսները եւ գեղարուեստական ոճը, վստահ ենք թէ այս նոր ցուցահանդէսն ալ պիտի արժանանայ դրական արձագանգներու։
Ցուցահանդէսը կը կայանայ Գուզկունճուք «Իմոկա» ցուցասրահի մէջ 16 Մարտ եւ 5 Ապրիլ թուականներու միջեւ։
