Փոխանորդին ի-մակները Ա.
ՍԵՒԱՆ ՏԷՅԻՐՄԵՆՃԵԱՆ
Ցանցահէն բարեկամներ պատրիարքարանին համակարգիչները ենթարկեցին իրենց եւ զանոնք մանրակրկիտ խուզարկելէ ետք ձեռք անցուցին բոլոր ի-մակները, զոր վերջին շրջանին իր ծանօթներուն կամ բարեկամներուն գրած է Արամիկ Աթէշեան։ Ապագայ պատմաբաններուն համար յոյժ կարեւոր այս փաստաթուղթերը, աւելորդ է ըսել, պոլսահայութիւնը յուզող վերջին շրջանի իրադարձութիւններուն լուսոյ նշոյլ մը սփռելու եւ Աթէշեանին բնաւորութիւնը աւելի մօտէն ճանչնալու տեսակէտէ ալ ունին իւրայատուկ նշանակութիւն։
Այսու կը սկսինք հրատարակել անոնցմէ աւելի ուշագրաւները։
Սեւան Տէյիրմենճեան
Պոլիս, 15 Մարտ 2018
Սիրելի բարեկամ,
Հիմա վստահ ալ չեմ՝ փոխանորդ արտայայտութիւնը գործածե՞լ թէ չգործածել։ Համայնքին մէջ կան մարդիկ, որոնք փոխանորդ բառը լսելնուն՝ իրենց ականջները ամուր կը գոցեն, բերաննին լայն կը բանան ու կը սկսին այնպիսի աղմուկ մը հանել, որ կարծես նոր սկսած է Պեշիքթաշին խաղը։ Վերջերս, սիրելի բարեկամ, «Մարալ»ի համերգին հրաւիրեցին, մէկ կողմէ ալ ըսին, որ աւելի լաւ կ՚ըլլայ չերթալս։ Ինչո՞ւ չերթամ։ Ելայ կանուխէն գացի, որ ներս մտնելուս քիչ մարդ ըլլայ, զիս չտեսնեն։ Անցեալ տարուան համերգին տեղապահ մը ընտրուած ըլլալը պատրուակելով հանդիսավարը անունս չէր յիշած… Պարախումբին վարիչները կանչած, աղուոր մը խաշած էի։ Այս տարի խօսնակը երբ անունս կարդաց՝ մե՜ծ աղմուկ փրթաւ, պոռացին, կանչեցին, սուլեցին։ Գետնին տակը մտայ։ Պիտի ձգէի երթայի, բայց քովիններս արգելք եղան։ Համերգէն վերջ ալ թերթիկներ նետեցին ասդին-անդին։ Չեն ամչնար, անկիրթնե՛ր։ Ընդդիմադիրներս 60-70 հոգի կը կարծէի, բայց կարծեմ աւելի շատ են։ Ինչքան ուզեն պոռան, կանչեն, հո՛գս… Պետութեան թուղթը ունիմ, փոխանորդը ե՛ս եմ։ Աղթամարի գլխուն խաչը ես դնել տուի, Տիյարպաքըրի եկեղեցին ես շինել տուի, պատրիարքարանին փողոցը ես շինել տուի, Սանասարեանն ալ ես ետ առի։ Խորհրդակցական մարմին մը կազմելու եւ ասոր-անոր խոշ երեւելու մասին ըսածներդ պիտի մտածեմ։ Վաղը իրիկուն Քուրթուլուշի տունս հանդիպէ, խօսինք։ Շիշ մըն ալ «Յովիկ Քալող» բեր, ունեցածներս լմնցան։
Օրհնութեամբ՝
Փոխանորդ
*
Գումգաբու, 20 Մարտ 2018
Օրհնութիւն որդւոյ մերում բարերարի Արմոնի Վոսփորեցւոյ,
Պատրիարքարանին փողոցը շինել տուի, Աղթամարին խաչը դնել տուի, Սանասարեան խանը առի, Տիյարպաքըրի եկեղեցին շինել տուի եւ պետութեան թուղթն ալ ունիմ՝ ըստ որու փոխանորդը ես եմ եւ մինչեւ պատրիարքին մահը ես պիտի ղեկավարեմ համայնքը։ Ասոնք արդէն գիտես, սիրելի Արմոն, եւ գիտնալուդ համար ալ կը պաշտպանես զիս իմ հակառակորդներուս դէմ, կը գովաբանես, տեղը գալուն՝ խօսքդ չես խնայեր։ Ասոնք բոլորը, ուրիշ բաներ ալ ականջիս կը հասնին։ Կը գնահատեմ քու եւ կնկանդ ջանքերը։ Շուտով քեզ ալ պիտի հրաւիրեմ խորհրդակցական մարմինին անդամակցելու։ Առանց քեզի չ՚ըլլար, սիրելիս։ Վաստակդ մեծ է։
Ձեր այդ կողմերը ընդարձակ տարածութիւն մը կայ, որ անցեալին պատկաներ է հայու մը։ Այս նիւթը ժամանակին կարգադրած էի, սակայն մինչեւ այսօր առնելիքս չեն տուած։ Լսեցի որ քու եւ կնոջդ բարեկամներն են։ Լաւ կ՚ըլլայ եթէ խօսիս ու իրենց յիշեցնես առնելիքս։ Եթէ ամէն ինչ բարւոք վերջանայ թերեւս դրացի ալ ըլլանք։ Շքանշան տուա՞ծ էի քեզի։ Հաճիս յիշեցուր։
Սիրոյ ողջունիւ՝
Փոխանորդ
*
Քուրթուլուշ, 20 Մարտ 2018
Յարգելի պարոն Դաւիթեան,
Տուն գալու ատեն ելեկտրական ձօղերուն վրայ տեսայ իմ ծաղրանկարներս։ Մէկերը փակցուցեր են, որպէս թէ զիս ծաղրել ու վարկաբեկել կ՚ուզեն։ Խենթ պիտի ըլլամ։ Պատրիարքարանին փողոցը շինել տուի, Աղթամարին խաչը դնել տուի, Սանասարեան խանը առի, Տիյարպաքըրի եկեղեցին շինել տուի եւ պետութեան թուղթն ալ ունիմ՝ ըստ որու փոխանորդը ես եմ, սակայն այս անկիրթ-ապերախտները զիս կը ծաղրեն, ամէն տեղ ծաղրանկարներս կը փակցնեն։ Ի՞նչ ընենք, պարոն Դաւիթեան։ Կրնա՞նք արդեօք պատժել տալ այս սրիկաները։ Ես իմ թիկնապահ ոստիկաններուս կրնամ հրահանգել որպէսզի պողոտայի տեսախցիկները քննեն եւ յայտնաբերեն ու ձերբակալեն այս կպիկները փակցուցած մարդը։ Թէեւ ես կ՚ենթադրեմ ով ըլլալը, բայց փաստ ունենանք մեր ձեռքին։ Գիտեմ, որ դուք լաւ փաստաբան մըն էք եւ համայնքային մեր հարցերը անմիջապէս կը լուծէք, պարոն Դաւիթեան։ Այս գործն ալ կարգադրեցէք, աչքերնիդ սիրեմ։
Ուրիշ հարցում մըն ալ ունիմ։ Պիլեզիքճի փողոցի տունը պիտի փլեն։ Կապալառուն խոստացաւ մէկ յարկ տալ, բայց ես կ՚ուզեմ երեք յարկաբաժին ունենալ։ Ինչպէ՞ս ընենք։ Եթէ պէտք է նիւթական զոհողութեան ալ պատրաստ եմ։ Ձեզի կարծեմ Օրմանեան շքանշան մը տուած էի։ Յովակիմ ալ կրնամ տալ եթէ սա գործը յաջողցնէք։
Ողջ լերուք ի Քրիստոս Յիսուս,
Փոխանորդ
*
21 Մարտ 2018
Պահչեշեհիր
Սիրելիս,
Կպիկները փակցուցած մարդը գտայ։ Բայց ըսին, որ չեմ կրնար դատի տալ եղեր։ Ես, որ պատրիարքարանին փողոցը շինել տուի, Աղթամարին խաչը դնել տուի, Սանասարեան խանը առի, Տիյարպաքըրի եկեղեցին շինել տուի եւ պետութեան թուղթն ալ ունիմ՝ ըստ որու փոխանորդ եմ, դատ մը պիտի չկրնա՞մ բանալ։ Փաստաբանը ըսաւ, որ ծաղրանկար ըլլալուն չենք կրնար բան մը ընել եղեր, եթէ ուղղակի իմ լուսանկարս ըլլար՝ թերեւս, որեւէ յանցանք չկայ եղեր… Կատարեալ խայտառակութիւն։ Դուն ծանօթ փաստաբան մը ունի՞ս։ Սա գործը հետապնդենք։ Օրմանեան շքանշան կու տամ իրեն։ Թերեւս խորհրդակցական մարմինին ալ անդամ ընեմ։ Չեմ գիտեր, տեսնենք։ Ջիղերս ոտքի ելան։ «Յովիկ Քալող» մը պարպեցի հանգստանալու համար։ Շատ տխուր եմ։ Ինչ կ՚ըլլայ, այս գիշեր ազատ ես եթէ քովս եկո՛ւր։ Պահչաշեհիրի տունն եմ։ Ուրախ կ՚ըլլամ։ Անկիւնէն ճիփս ու չոր պտուղ բեր, «Ուսուցիչ» մըն ալ առ, կը նստինք…
Անհամբեր քեզ սպասող՝
Փոխանորդ
