Բրիտանացի պատգամաւորներ կառավարութեան ուղղեցին
Մեծ Բրիտանիոյ խորհրդարանի խումբ մը պատգամաւորներ երկրի կառավարութեան յղուած նամակի մը մէջ խստօրէն դատապարտեցին Պաքուի մէջ պահուող 23 հայերու շարունակական բանտարկութիւնը եւ դատավարութիւնները, նաեւ կոչ ուղղեցին Մեծն Բրիտանիոյ կառավարութեան՝ ճնշում բանեցնելու Ատրպէյճանի վրայ` նպաստելով հայ բանտարկեալներու ազատ արձակման:
Նամակը կառավարութեան ուղարկուած է Մեծն Բրիտանիոյ խորհրդարանի անդամ, խորհրդարանին մէջ Հայաստանի հետ խորհրդարանական բազմակուսակցական բարեկամական խումբի նախագահ Ճեսիքա Մորտենի, խումբի փոխնախագահներ` Ճոն Ուիթինկտէյլի, Կրիս Լոնի եւ Լորտ Մարք Մքիննըսի կողմէ, «Էքս»ի իր էջին վրայ կը յայտնէ Մորտեն` կից տարածելով նաեւ համապատասխան նամակը:
«Մեծ մտահոգութիւն կայ, նաեւ՝ բանտարկեալներու հարազատներէն եւ Մեծն Բրիտանիոյ Հայկական Սփիւռքէն եկող լուրերուն գծով` բանտարկեալներու անկախ իրաւական աջակցութեան բացակայութեան, ֆիզիքական եւ հոգեբանական խոշտանգումներու, ինչպէս նաեւ միջազգային կազմակերպութիւններուն եւ լրատուամիջոցներու ներկայացուցիչներուն դատավարութիւններուն հետեւելու արգելքին գծով: Մենք նաեւ ահազանգ կը հնչեցնենք Ատրպէյճանի արտաքին գործոց նախարարութեան հրամանով Պաքուի մէջ BBC News Azerbaijan-ի եւ «Ամերիկայի Ձայն»ի գործունէութեան դադրեցման մասին, Ատրպէյճանի իշխանութիւններուն կողմէ Կարմիր Խաչի միջազգային կոմիտէի գործունէութեան դադրեցման, ինչպէս նաեւ ՄԱԿի բազմաթիւ գործակալութիւններու երկրէն արտաքսելու մասին հաղորդուող սպառնալիքներուն վերաբերեալ: Բանտարկեալներու ընտանիքներուն անդամները մեզի կը յայտնեն, որ անոնք կը գտնուին գրեթէ ամբողջական մեկուսացման մէջ եւ հազուադէպ կապ կը հաստատեն հարազատներու հետ: Մենք յատկապէս մտահոգուած ենք բանտարկեալներէն մէկուն` Ռուբէն Վարդանեանի առողջական վիճակով, որ մինչեւ վերջերս գրեթէ մէկ ամիս հացադուլի մէջ էր: Մենք կը խնդրենք, որ նախարարները քննարկեն Պաքուի մէջ բրիտանական դեսպանութեան ներկայացուցիչներուն` 23 հայ բանտարկեալներուն այցելելու հնարաւորութիւնը: Մենք նաեւ կը խնդրենք նախարարներէն` հաստատակամօրէն խնդրելու Ատրպէյճանէն` թոյլատրել Կարմիր Խաչի միջազգային կոմիտէի ներկայացուցիչներուն վերադառնալ Ատրպէյճան եւ այցելել բանտարկեալներուն` ստուգելու անոնց առողջական վիճակը, վերականգնել Պաքուի մէջ BBC News Azerbaijan-ի աշխատանքները, ինչպէս նաեւ ապահովել դատավարութիւններու մանրազնին վերահսկողութիւնը եւ անյապաղ կերպով ազատ արձակել բոլոր հայ բանտարկեալները` իբրեւ երկու երկիրներուն միջեւ կայուն խաղաղութեան տանող ուղիի գրաւական», կ՛ըսուի բրիտանացի պատգամաւորներուն վերոնշեալ նամակին մէջ։
