Փարաճանովի 100-ամեակի առթիւ
Իպատիւ հայ ականաւոր շարժանկարի բեմադրիչ Սերկէյ Փարաճանովի հարիւրամեակին, աւելի քան 40 հայ ձեւագէտ-ոճաբաններ ներկայացուցին եզակի գործեր՝ ոգեշնչուած անոր յաւէրժական արուեստով։ Մայիս 18-31 Սերկէյ Փարաճանովի տուն-թանգարանին մէջ տեղի ունեցաւ «Փարաճանովը եւ նորաձեւութիւնը» խորագիրով աննախընթաց եւ իւրայատուկ ցուցահանդէսը։ Փարաճանովը հսկայ ժառանգութիւն թողած է իր ետին, անժամանցելի եւ անհերքելի արժէքներ են անոր «Մոռացուած նախնիների ստուերները», «Նռան գոյնը», «Յակոբ Յովնաթանեան»ը, «Աշուղ Ղարիպ»ը եւ տասնեակ մը այլ ժապաւէնները։ Քիչեր գիտեն, որ մեծ վարպետին ստեղծագործական տաղանդը դրսեւորուած չէր միայն շարժանկարի աշխարհէն ներս. ան տարբեր առիթներով տարազներ ստեղծած էր իր եւ ընկերներուն համար, իսկ կալանքի տարիներուն պատրաստած է զարմանահրաշ քոլաժներ, զարդեր եւ այլն…
Ցուցահանդէսին ներկայացուած են թէ՛ Փարաճանովի ստեղծագործութիւնները եւ թէ՛ հայ ձեւագէտներուն աշխատանքները `տարազներ, գլխազարդեր, ժանեակներ, մետաղեայ կախազարդեր, բոլորն ալ` ոգեշնչուած մեծ արուեստագէտին թողած հարուստ ժառանգութենէն։
Այցելուներու ուշադրութենէն չի վրիպիր ցուցահանդէսին ամենահետաքրքրական նմուշներէն մէկը`«Just Black»-ի կերպարը, որ ներշնչուած է Փարաճանովի «Ի յիշատակ Պաքուի 26 կոմիսարների» քոլաժէն եւ կը միաւորէ հայկական երկու խորհրդանիշներ՝պտղաբերութեան աստուածուհի Անահիտը եւ Գարեգին Նժդե-հը,`աննկուն ոգիով զօրավարը։
Յունուար 9-ին Հայաստանի մէջ ծայր առին Սերկէյ Փարաճանովի 100-ամեակին նուիրուած ձեռնարկները։ «Փարաճանովը եւ նորաձեւութիւնը» ցուցահանդէսը կ՛իյնայ այդ ձեռնարկներու ծիրէն ներս։ Կը սպասուի հրաշալի իրադարձութիւններու ամբողջ շարք մը` արժեւորելու Փարաճանովի արուեստը, որ կը շարունակէ ապրիլ, ապրեցնել ու ոգեշնչել բազմաթիւ երիտասարդներ։
