Փայլան ատրպէյճանցիները եւ հայերը հաշտեցնելու կոչ կ՚ընէ Անգարային
Թուրքիոյ քրտամէտ Ժողովուրդներու ժողովրդավարական կուսակցութեան հայ երեսփոխան Կարօ Փայլան Թուրքիոյ խորհրդարանին մէջ տրուած մամլոյ ասուլիսի մը ընթացքին տեղեկութիւններ տուաւ Հայաստան իր այցելութեան մասին։ Այս մասին հաղորդեց «Էրմէնիհապեր»ը։
Փայլան նշեց, որ այցելութեան ընթացքին հանդիպեցաւ Հայաստանի նախագահին, վարչապետին եւ Ազգային ժողովի նախագահին հետ։
Նշելով, որ այցելութեան ընթացքին քննարկուեցան հայ-թրքական յարաբերութիւններու կարգաւորման հոլովոյթը եւ «մնայուն խաղաղութիւն» հաստատելու վերաբերեալ հարցերը՝ Փայլան ըսաւ. «Կը կարծեմ, որ Կովկասի մէջ խաղաղութիւն հաստատելու համար կայ լուրջ կարելիութեան պատուհան, սակայն կան նաեւ վտանգներ։ Կը կարծեմ, որ դժուար է հաշտեցնել այն ժողովուրդները, որոնք երկար ժամանակ իրարմէ նեղացած են։ Անոր համար պէտք է քաջութիւն։ Ես այդ պայքարի ջատագովն եմ։ Կ՚ուզեմ, որ Թուրքիոյ, Ատրպէյճանի ու Հայաստանի բոլոր քաղաքական գործիչներն ալ ըլլան անոր կողմնակիցը։ Այժմ խաղաղութեան համար կարելիութիւն կայ. երկու եղբայրական ժողովուրդները հաշտեցնելու համար բանալի գոյութիւն ունի։ Եւ այդ բանալի երկիրը Թուրքիան է։ Թուրքիոյ մէջ բոլոր դերակատարներուն, քաղաքական կուսակցութիւններուն, կառավարութեան, պարոն նախագահին իմ կոչս է՝ «եկէ՛ք այս երկու եղբայրական ժողովուրդները հաշտեցնենք»։
