Օրագրութիւն Հայաստանի Գ. հանրապետութեան
Պատմաբան Վահէ Տէր Մինասեանի հեղինակած «Հայաստանի Գ. հանրապետութեան օրագրութիւնը» խորագրեալ ուսումնասիրութիւնը լոյս տեսաւ ֆրանսական «Լարմաթան» հրատարակչութեան մատենաշարէն։ Հեղինակը իր այս աշխատութեան մէջ կ՚ուսումնասիրէ նորանկախ հանրապետութեան 1991 թուականէն այս կողմ անցած քաղաքական, տնտեսական եւ հասարակական զարգացումները։ Խորապէս կ՚ուսումնասիրէ Թուրքիոյ եւ Ատրպէյճանի հետ ունեցած յարաբերութիւնները։ Լայն տեղ տրուած է Փաշինեանի գլխաւորած Թաւշեայ յեղափոխութեան, որու աւարտին երկիրը ունեցաւ ճակատագրական շատ կարեւոր անցում մը։
Տէր Մինասեանի գիրքին մէջ ուշագրաւ անդրադարձ մը կը կատարուի նաեւ «Ակօս»ի հայերէն էջերուն նախկին աւագ խմբագիր Սարգիս Սերովբեանի մասին։ Վահէ Տէր Մինասեանի համաձայն Սերովբեան պատմական Հայաստանի մշակութային ժառանգը, թէ թուրք մտաւորականութեան եւ թէ հայոց կը ծանօթացնէր իր անհուն գիտելիքներու պաշարի միջոցաւ։
