Նոր հակադրութիւն, «Ամէն քնով ընտրութիւն»ի փոխարէն «Կամ արդար ընտրութիւն, կամ ոչ»
Քանի կը մօտենայ պատրիարքական ընտրութեան համար նախատեսուած թուականը, ընտրութեան գործընթացն ալ կը ստանայ հետաքրքրական երեսակներ։ Թեկնածու երկու եպիսկոպոսները թափ տուած են պատգամաւորներու ցանկերու պատրաստութեան։ Սակայն որպէս նոր երեւոյթ, կը յայտնուին նաեւ անկախ պատգամաւորի թեկնածուներ եւս։ Սա պահուն յստակացած անուն մըն է Կարպիս Էվեափան, որ իր անկախ թեկնածութիւնը առաջադրած է Պոյաճըգիւղի Սուրբ Երից Մանկանց եկեղեցիէն։
«Նոր Զարթօնք» պոյքոթի կը կանչէ
Իսթանպուլահայ համայնավար երիտասարդական հարթակ մը ըլլալով ձեւաւորուած «Նոր Զարթօնք» շարժումը ընկերային ցանցերու մէջ յայտարարութիւն մը հրատարակելով պոլսահայութեան կոչ ուղղեց այս անարդար ընտրութիւնը կասեցնելու համար։ «Բացայայտ կերպով ոտնակոխուած է կրօնքի ազատութիւնը։ Կը մերժենք այս անարդարութեան մասնիկը ըլլալ եւ կը յայտարարենք, թէ պիտի զօրակցինք առկայ ընտրութեան գործընթացը խափանելու համար մղուած իրաւական պայքարին։ Թեկնածուներուն կ՚առաջարկենք պատուաւոր կեցուածք պահել եւ Գարեգին Պէքճեան սրբազանը օրինակելով հրաժարիլ թեկնածութենէ։ Այս պայմաններու մէջ կայանալիք ընտրութեան տրուած ամէն ձայն անարդարութիւնը եւ իրաւունքներու յափշտակումը պիտի արդարացնէ։ Ուստի հասարակութեան կոչ կ՚ընենք ընտրութիւնը պոյքոթելու համար»։
Մաշալեանի խնդրանքը Ջուլճիեանէն
Պատրիարքութեան թեկնածու սրբազաններէն Սահակ եպս. Մաշալեան Սամաթիոյ Սուրբ Գէորգ եկեղեցւոյ շրջափակին գտնուող Հրաչեայ Աճարեան սրահին մէջ հանդիպում մը ունեցաւ թաղի բնակիչներուն հետ։ Սրբազանը իր հոգեւոր ճամբորդութեան մասին հակիրճ տեղեկութիւններ փոխանցելէ ետք զանազան նիւթերու կարգին անդրադարձաւ նաեւ ընտրութիւնները պոյքոթելու երեւոյթին եւ յայտնեց թէ Էջմիածնի Գերագոյն Հոգեւոր Խորհուրդի նիստի ընթացքին Սեպուհ սրբազանէն խնդրած է, որպէսզի ան իր համակիրները համոզէ պոյքոթի գաղափարէն հեռու մնալնուն համար։
Սեպուհ սրբազան «Ակօս»ին տուած բացատրութիւններուն մէջ ինք եւս հաստատեց Մաշալեանի խնդրանքը եւ յայտնեց թէ ինք մերժած է Պոլսոյ մէջ իրեն ի նպաստ աշխատողներուն կամ ալ պարզապէս արդար ընտրութեան պահանջով առարկութիւն ունեցողներուն որոշումներուն միջամտել։ «Կը տեսնեմ թէ հասուն եւ գիտակից մարդիկ են։ Ես իմ վրայ իրաւունք չեմ տեսներ անոնց որոշումներուն միջամտելու»։
Իրաւական պայքար Պատրիարքական ընտրութեան դէմ
«Հասարակական նախաձեռնութիւն» շարժումը իրաւական պայքարի ձեռնարկեց պատրիարքական ընտրութիւնները կասեցնելու համար։
Այս մասին կատարուած հաղորդագրութեան մէջ կը նշուի թէ, յանուն հասարակութեան լայն զանգուածի, բազմիցս կոչ ուղղուած է Պատրիարքական Տեղապահ Սահակ եպսկ. Մաշալեանին եւ Նախաձեռնարկ Մարմնին, արդար ընտրութեան համար անհրաժեշտ միջոցներու դիմելու գծով։
Ներքին գործերու նախարարութեան պատրաստած կանոնագիրը կը վտանգէ Պատրիարքական Աթոռի ապագան։ Անընդունելի է այս գիտնալով հանդերձ, լոկ ներկայ ընտրութիւնը ապահովելու համար անօրէնութեան համակերպիլ։
Այժմ խնդիրը փոխադրուած է դատական դաշտ, նախարարութեան կողմէ ղրկուած կանոնագիրը չեղեալ համարելու եւ սահմափակումներէ ձերբազատուած նոր կանոնագիր մը պատրաստելու պահանջով։
