Մենք եւ մեր մեռելները
Թուրքիոյ քաղաքական վերիվայրումները անընդունելի պատկերներով կը ցնցեն հասարակական զգացումները։ Բռնութիւնը, վայրագութիւնը եւ ոխը չեն գոհանար երիտասարդներ, կիներ, երախաներ սպաննելով եւ կը դիմեն սպաննուած անշունչ մարմինները սրբապղծելու նողկալի արարքին։ Սպանուած կիներու անշունչ մարմինը ամբողջովին մերկ վիճակով կը ցուցադրուի քաղաքներու մէջ։ Այդ պահուն կը նկարահանուի եւ տեսանիւթը կ՚ուղղարկուի լրատու գործակալութիւններուն։ Կամ ալ ուրիշ սպաննուածի մը դիակը կը կապուի զրահապատ ինքնաշարժի մը եւ քաշ կը տրուի քաղաքի փողոցներուն մէջ։ Նման երեւոյթները մարդկանց մտածել կու տան մեռելներու իրաւունքներուն մասին, որու հետեւանքով Զմիւռնիոյ մէջ կազմակերպուեցաւ «Մենք Եւ Մեր Մեռելները» խորագրեալ ասուլիս մը։
Ասուլիսին մասնակցողները այս խորագրի ներքեւ զեկուցեցին մեռելներու դէմ անյարգանքի զանազան օրինակներ։ Երեք հասարակական կազմակերպութիւններու, միասեռականներու «Քաօս-ԿԼ», ալէվիներու «Հաճը Պէքթաշը Վէլի» մշակոյթի կեդրոնը եւ գաղթականներու հարցերով զբաղուող «Ժողովուրդներու Կամուրջը» միութիւնը միասնաբար կազմակերպած են այս ասուլիսը, որ կայացաւ Շաբաթ, 24 Հոկտեմբերին, Զմիւռնիոյ «Քիւլթիւր Փարք» տարածքին մէջ։ Հասարակական գործիչներէ եւ երիտասարդներէ բաղկացած հետաքրքիր զանգուած մը, օրնիբուն հետեւեցան երեք անջատ նիստերու ընթացքին արծարծուած ելոյթներուն։ Հարկ է նշել որ երեւոյթը ինքնին բաւական յուզիչ էր, քանի որ զեկուցողներ ամէն մէկը կը ներկայացնէր իր պատկանելութեան անդամներուն ուղղուած յետ-մահու տանջանքներու օրինակներ։
Միջոցառման բացումը կատարեց Փրոֆ. Կէօքչէն Ալփքայա, որ իր ելոյթին մէջ անդրադարձաւ սահմանադրութեան եւ օրէնսգիրքի անշունչ մարմիններու իրաւունքներուն վերաբերեալ յօդուածներուն։
Կազմակերպիչները մտադրած էին «միւսը» համարուածներու ապրած փորձութիւնները տեսանելի դարձնել։ Այդ պատճառով հրաւիրուած էին տարբեր ազգութիւններու, տարբեր սեռային նախասիրութիւն ունեցողներու եւ տարբեր հաւատքի հակումներու ներկայացուցիչները։ Այս զանազանութիւնը մանաւանդ շեշտուած էր օրուան վերջին մէկտեղումին, երբ զմիւռնիաբնակ յոյներու ներկայացուցիչ Թէոտորա Հաճուտի, միասեռականներու ներկայացուցիչներ Ալի Էրօլ եւ Կանիմէթ, Խաղաղութեան Մայրերու ներկայացուցիչ Պէհիյէ Եալչըն, հայերու ներկայացուցիչ Բագրատ Էսդուգեան, ղըզըլպաշ ալէվի-պէքթաշիներու ներկայացուցիչ Էրճան Կէչմէզ, չբացայայտուած մարդասպանութիւններու զոհերու ներկայացուցիչ Սինան Տէմիրքան եւ նման անուններ առիթ ընձեռեցին որ ներկաները մարդկութեան դէմ գործուած այս յանցագործութիւնները լսեն տարբեր տեսանկիւններէ։
