Մահ՝ երէց Կեդրոնականցիին

«Ժա­մը ճիշդ 12։44-ին դուն բեմ կ՚ել­լես եւ շրջա­նաւարտ դա­սարա­նի անու­նով կ՚ար­տա­յայ­տուիս։ Չորս վայրկեան կը տե­ւէ քու ելոյ­թը։ Քեզ­մէ ետք բեմ պի­տի ել­լեն նախ խնա­մակա­լու­թեան ատե­նապե­տը, երեք վայրկեանով, եւ ապա հիմ­նա­դիրը, դար­ձեալ երեք վայրկեան։ Վեր­ջին ել­լո­ղը տնօ­րէնը պի­տի ըլ­լայ, չորս վայրկեանի մէջ պի­տի աւար­տէ իր ելոյ­թը եւ նոյն պա­հուն բեմ պի­տի հրա­ւիրէ այդ պա­հուն սրա­հին մէջ գտնուող կրտսե­րագոյն եւ երի­ցագոյն Կեդ­րո­նական­ցի­ները։ Ար­դէն ժա­մը ճիշդ 13.00 է եւ բո­լորը պի­տի գո­ռան –Ապ­րի Կեդ­րո­նակա­նը, ապ­րի Կեդ­րո­նական­ցին»։

Կեդ­րո­նակա­նի բազ­մա­թիւ սա­ներ իրենց աւագ եղ­բօր՝ նո­րոգ հան­գուցեալ Տոքթ. Հեր­մոն Արաք­սի դար­մա­նատան մէջ լսած են այս ճշդա­պահ կար­գադրութեան վե­րեւ փո­խադ­րուած նա­խադա­սու­թիւննե­րը։

Ափ­սո՜ս որ 24 Յու­նիս Չո­րեք­շաբթի, ցե­րեկուայ ժա­մերուն կորսնցու­ցինք բո­լորին սի­րելի Տոքթ. Արաք­սը։ Ան ծնած էր 1923 թուակա­նին, Իս­թանպու­լի մէջ։ Նախ­նա­կան ու­սումը ստա­ցաւ Էսաեան, երկրորդական ու­սումն ալ Կեդ­րո­նական վար­ժա­րանի մէջ։ Աւար­տեց Իս­թանպու­լի բժշկա­գիտու­թեան դպրո­ցը եւ լման վեց տա­րիներ աշ­խա­տեցաւ Կե­սարիոյ մէջ։ Վայե­լեց տեղ­ւոյն ժո­ղովուրդին մեծ հա­մարկրան­քը։ Այդ տա­րինե­րուն հե­տեւե­լով Գա­րեգին Պատ­րիարք Գա­զան­ճեանի թե­լադ­րանքնե­րուն հա­յերէ­նի դա­սաւան­դութիւններ կա­տարեց Կե­սարիոյ մէջ։ Իր դաս­տիարա­կած աշա­կերտնե­րը աւե­լի ետք ար­ձա­նագ­րուեցան Իս­թանպու­լի նո­րահաս­տատ Սուրբ Խաչ Դպրե­վանք վար­ժա­րանը։ Տոքթ. Արաքս ամուսնա­նալէ ետք Ռի­թա Հա­մամճեանի հետ, շա­րու­նա­կեց դաս­տիարակ­չա­կան առա­քելու­թիւնը նաեւ Պոլ­սոյ իր բնա­կարա­նին մէջ։ Ինչպէս ըսած էինք Ար­փիկ Մի­սաքեանի մա­հուան առ­թիւ, Տոքթ. Արաք­սի կո­րուստով դար­ձեալ պատ­մութեան կա­րեւոր էջ մը կը փա­կուի պոլ­սա­հայ իրականութեան մէջ։ Վեր­ջին ամիս­նե­րու իրերա­յա­ջորդ կերպով կ՚ապ­րինք ան­փո­խարի­նելի դէմ­քե­րու կո­րուստին պատ­ճա­ռած կսկի­ծը։ Տոքթ. Արաքս ալ կու ­գայ միանա­լու Սար­գիս Սե­րով­բեանի, Ար­փիկ Մի­սաքեանի եւ նման­նե­րու կորուստով գոյացած մեծ պա­րապու­թեան վրայ նոր մը աւելցնե­լու։ Կը սգակ­ցինք սի­րելի Տի­կին Ռի­թա Արաք­սին, մեր պաշ­տօ­նակից եւ բա­րեկամ՝ Ռաֆ­ֆի Արաք­սին եւ ըն­տա­նեկան պա­րագա­ներուն։ Իսկ սի­րելի տոք­թո­րին կը մաղ­թենք երկնա­յին հան­գիստ արդարներու օթեւանին մէջ։