Մահ Ռիչարտ Յովհաննէսեանի
Ժամանակակից հայ պատմագրութեան ամենակարկառուն դէմքերէն Փրոֆ. Ռիչարտ Յովհաննէսեան 10 Յուլիս երկուշաբթի օր մահացաւ Լոս Անճելըսի մէջ։
90 ամեայ Յովհաննէսեան կը յիշուի որպէս Գալիֆորնիոյ համալսարանի մէջ հայոց արդի պատմութեան ամպիոնի հիմնադիր դասախօս։ Ան հեղինակած է Հայաստանի առաջին հանրապետութեան մասին չորս հատորներէ բաղկացող հսկայ ուսմնասիրութիւն մը։ Բացի այդ Ռիչարտ Յովհաննէսեանի տարբեր թուականներուն սարքած բանախօսութիւններէն պատրաստուած է Արեւմտեան Հայաստանի քաղաքներու պատմութիւնը, որոնք թրքերէն թարգմանութիւնով հրատարակուած են «Արաս» հրատարակչատան կողմէ։
Այսպէս Վան, Պիթլիս, Մուշ, Խարբերդ եւ Իզմիրը նիւթ առնող հատորներէ զատ «Արաս»ի հրատարկման ծրագրին մէջ կը սպասեն նաեւ շատ մը այլ գիրքեր։
Ռիչարտ Յովհաննէսեան անձամբ ալ այցելած է Թուրքիա, մասնակցելու համար Հրանդ Տինք Հիմնարկի կազմակերպած բանախօսութիւններուն։
Մենք եւս առիթը ունեցած էինք վայելելու իր մտերմութիւնը Վանի Աղթամար կղզու Սուրբ Խաչ Եկեղեցւոյ վերաբացման օրերուն։ Ան ընդառաջած էր մեր հրաւէրին, վանեցի լրագրողի մը համեստ բնակարանին մէջ։ Այդ օր Ռիչարտ Յովհաննէսեան սեղանակից եղած էր տեղացի եւ սփիւռքահայ ակադեմականներէ եւ մտաւորականներէ բաղկացող խիստ մտերիմ զանգուածի մը։
Ռիչարտ Յովհաննէսեան նահապետն էր նաեւ ընտանիքի մը, որուն անդամները կարեւոր դերակատարութիւն ունեցան հայ իրողութեան մէջ։ Իր որդին՝ մեր սիրելի բարեկամ Ռաֆֆի Յովհաննէսեան եղած էր Հայաստանի Հանրապետութեան առաջին Արտաքին գործոց նախարարը։
Այս առթիւ կը սգանք մեծանուն փրոֆէօսորի կորուստը եւ կը վշտակցինք Յովհաննէսեան ընտանիքին, կիսելով անոնց սուգն ու վիշտը։
