Մահ լրագրող Ճելալ Պաշլանկըչի
ՎԱՐԴԱՆ ԷՍԴՈՒԳԵԱՆ
Թրքական մետիայի վաստակաւոր լրագրողներէն Ճելալ Պաշլանկըչ մահացաւ Գերմանիոյ Քէօլն քաղաքը, ուր երկար տարիներէ ի վեր պարտադիր բնակութիւն հաստատած էր։
68-ամեայ լրագրողը աւարտած էր Եգէական Համալսարանի լրագրողութեան բաժինը եւ աշխատակցած էր բազմաթիւ լրատուամիջոցներու։ Հիմնադիրներէն եղած էր «Արթը ԹՎ» եւ «Արթը Կերչէք» կայքերուն։
3 Մայիսին մահացող Ճելալ Պաշլլանկըչի թաղումը տեղի ունեցաւ 10 Մայիսին Քէօլնի մէջ։ Նախքան թաղման կարգը ոգեկոչման յատուկ միջոցառում մը կազմակերպուեցաւ, որուն մասնակցեցաւ Ճելալ Պաշլանկըչի այրին՝ ինք եւս լրագրող Այշէ Եըլտըրըմ, Հասան Ճեմալ, Ճան Տիւնտար, Էրք Աճարէր, Ռակըպ Տուրան, Քեմալ Կէօքթաշ, Կիւնայ Ասլան, Պանու Կիւվեն, Հայքօ Պաղտատ, Արիս Նալճըի նման հանրածանօթ լրագրողներ եւ ՏԵՄ կուսակցութեան նախկին եւ ներկայ պատգամաւորներ Էրթուղրուլ Քիւրքչիւ, Սարուհան Օլուչ եւ երաժիշտ Ֆերհատ Թունչ։
Ոգեկոչման հանդէսին «Ճումհուրիյէթ» թերթի նախկին խմբագրապետ Հասան Ճեմալ ելոյթ մը ունենալով դրուատեց Պաշլանկըչի լրագրողական առանձնայատկութիւնները։ Ան յիշեցուց անցեալին քրտաբնակ գիւղի մը մէջ զինուորներու ձեռամբ գիւղացիներուն կղկղանք կերցնելու դէպքը, որ մեծ արձագանգ եւ ընդվզում յառաջացուցած էր ու ապագային ալ պատճառ դարձած, որ Թուրքիա դատապարտուի ԵՄԻԱ-ի դատական վճիռով։
Այս ու նման լուրերու պատճառաւ Ճելալ Պաշլանկըչ ենթարկուեցաւ կառավարութիւններու հալածանքին եւ 2017-էն սկսեալ ստիպուեցաւ բնակութիւն հաստատել Գերմանիոյ մէջ, հոն եւս ծաւալելով լրագրողական բեղուն աշխատանք։
