Մահ՝ Հալիթ Քըվանչի
Թուրքիոյ ձայնասփիւռի եւ հեռուստացոյցի անուանի հաղորդավար ու խօսնակ Հալիթ Քըվանչ մահացաւ 97 տարեկան հասակին։
Քըվանչ ծնած էր 1926 թուականին։ Աւարտած էր Իսթանպուլի համալսարանի իրաւաբանութեան բաժինը։ Կարճ ժամանակ իբրեւ փաստաբան եւ դատաւոր աշխատելէ ետք ամբողջովին նուիրուեցաւ մամուլի աշխարհին։
Ան շատերուն ծանօթ էր ռատիոյի միջոցաւ ֆութպոլային մրցումները փոխանցելու յատուկ տաղանդով*։ Պատկերալից այդ պատմելաոճի շնորհիւ մարդիկ ռատիօ ընկալուչներու դիմաց կ՚ապրէին մարզադաշտի մէջ ըլլալու նման յուզումներ։Հալիթ Քըվանչ հեղինակած էր բազմաթիւ գիրքեր, որոնք իր անցած կեանքի վերաբերեալ յուշագրութեան բնոյթ ունէին։
«Ակօս»ի եւ Հրանդ Տինք հիմնարկի կամաւոր աշխատակիցներէն Իւմիթ Քըվանչ որդին էր Հալիթ Քըվանչի։
