Մակար Արք. Աշգարեան. «Ս. Ծննդեան եւ Աստուածայայտնութեան Տօնը Աստուծոյ մարմնաւորեալ սիրոյն տօնն է»
Մեր Տիրոջ եւ Փրկչին Յիսուս Քրիստոսի Սուրբ Ծննդեան եւ Աստուածայայտնութեան տօնին առիթով, Երկուշաբթի, 6 Յունուար 2025-ի առաւօտուն, հանդիսաւոր Սուրբ եւ Անմահ Պատարագ մատուցուեցաւ Բերիոյ Հայոց Թեմի եկեղեցիներէն ներս.
Բերիոյ Հայոց Թեմի Բարեջան Առաջնորդ Գերշ. Տ. Մակար Սրբ. Արք. Աշգարեան, եպիսկոպոսական հանդիսաւոր Պատարագ մատուցեց Սրբոց Քառասնից Մանկանց Մայր եկեղեցւոյ մէջ եւ Սուրբ Ծննդեան իր հայրական պատգամը ուղղեց ժողովուրդին.
Պատարագին ներկայ գտնուեցան Հայաստանի Հանրապետութեան Հալէպի Գլխաւոր Հիւպատոս մեծարգոյ Արա Աւետիսեան, ՀՀ Հիւպատոսութեան Խորհրդական Դաւիթ Թադէոսեան, Բերիոյ Հայոց Թեմի Ազգային Երեսփոխանական Ժողովի, Ազգային Կրօնական Ժողովի եւ Ազգային Վարչութեան անդամներ, Յարաբերական Մարմինի ներկայացուցիչ Վրէժ Եագուպեան, հալէպահայ կազմակերպութիւններու, մշակութային, մարզական եւ բարեսիրական միութիւններու եւ հաստատութիւններու ներկայացուցիչներ եւ հաւատացեալներու հոծ բազմութիւն։
Դպրաց դասի «Հրաշափառ» շարականի երգեցողութեամբ եւ թափօրով Սրբազան Հայրը մուտք գործեց եկեղեցի։
Եկեղեցւոյ մէջ կարգ ու կանոնը կը պահէին ՀՄԸՄ-ի տարազաւոր սկաուտները։
Տօնական ցնծութեամբ, եկեղեցւոյ դպրաց դասը Պատարագի հոգեպարար երգեցողութիւնը կատարեց, դպրապետ բարշ. Վաչէ սարկ. Գայթանճեանի ղեկավարութեամբ։ Սրբազան Հօր առընթերականերն էին Արժ. Տ. Նարեկ Ա. Քհնյ. Զերենցեան եւ Արժ. Տ. Գառնիկ քհնյ. Չափանեան։
Յընթացս Սուրբ եւ Անմահ Պատարագին, Սրբազան Հայրը Ջրօրհնէք կատարեց, որպէս խորհրդանիշ Քրիստոսի մկրտութեան։
Այնուհետեւ, Առաջնորդ Սրբազան Հայրը, Ս. Ծննդեան իր հայրական պատգամը ուղղեց ժողովուրդին։ Շարականագիրի բառերով Սրբազան Հայրը յայտնեց, թէ այսօր՝ Յիսուս Մանուկի ծնունդով, երկինքը մեծապայծառ աւետիսով կը ցնծայ վերէն եւ ողջ մարդիկը կը զգենուն փրկութեան հանդերձը։ Այլ խօսքով, մարդկութիւնը կորսնցուցած էր փրկութեան պատմուճանը, ուրախութիւնն ու ցնծութիւնը եւ խաւարով պատուած էր։ Այդ աւետիսը՝ փրկութեան բարի լուրն էր, որ մարդիկը տխրութենէն վեր պիտի բարձրացնէր, որպէսզի իրենց հոգիով տեսնեն ճշմարտութիւնը եւ հաղորդակից դառնան արդարութեան, սրբութեան եւ իրենց կեանքը ապրին ներքին խաղաղութեամբ, սիրով, համերաշխութեամբ եւ աստուածպաշտութեամբ։
Սրբազան Հայրը մէջբերելով Եսայի մարգարէութեան մէջ յիշուած Ս. Ծնունդի աւետիսը, մատնանշեց Մանուկ Յիսուսին տրուած Սքանչելի Խորհրդակից, Հզօր Աստուած, Խաղաղութեան Իշխան եւ Յաւիտենականութեան Հայր անունները, դիտել տալով, որ Աստուած մարդացաւ, որպէսզի իր կենդանի ներկայութեամբ աշխարհի պատկերը կերպարանափոխէ, որպէս լոյս՝ լուսաւորէ, որպէս կեանք՝ կենսաւորէ եւ որպէս արդարութիւն, սրբութիւն եւ ճշմարտութիւն՝ մարդկային ընկերութեան հիմքերը վերանորոգէ։
Սրբազան Հայրը յայտնեց, թէ մարդոց սրտերը քարացած էին, չկարողացան Քրիստոսը ընդունիլ իրենց սրտերուն մէջ, բայց անոնք որոնք հաւատացին եւ ընդունեցան՝ անոնց իշխանութիւն տուաւ Աստուծոյ որդիներ ըլլալու։
Յովհաննէս առաքեալի բառերով, Քրիստոս Աստուծոյ իմաստութիւնն է, որ մարմնացաւ, որպէսզի մարդիկ իրեն մօտենալով եւ իր հետ շփման մէջ մտնելով՝ ճանչնան զԱստուած, ճանչնան աստուածային ծրագիրն ու փրկագործութեան խորհուրդը եւ Քրիստոսի ընդմէջէն բացուին աստուածաճանաչողութեան։
Սրբազան Հայրը յայտնեց, թէ Ս. Ծննդեան եւ Աստուածայայտնութեան տօնը Աստուծոյ մարմնաւորեալ սիրոյն տօնն է։ Հետեւաբար, անհրաժեշտ է, որ պատրաստակամութեամբ մօտենանք Տիրոջ եւ հրաւիրենք զինք մեր սրտերուն մէջ բնակելու, այնպէս ինչպէս հովիւներն ու մոգերը, Յիսուս Մանուկին թանկագին նուէրներ բերելով, բացայայտեցին անոր Թագաւորներու Թագաւոր, Մարդացեալ Աստուած եւ Քահանայապետ ըլլալը, որ ինքզինք որպէս անմեղ գառնուկ զոհեց եւ իր արիւնով փրկեց մեզ։
Այս բերկրալի տօնին առիթով, Սրբազան Հայրը շնորհաւորեց չորս նուիրապետական աթոռներու Հայրապետներն ու Պատրիարք Հայրերը, Առաջնորդները, հայրենիքի պատասխանատուները, բանակը, հրամանատարները, զինուորները, ՀՀ Հալէպի գլխաւոր հիւպատոսը, հիւպատոսութեան խորհրդականը, Ազգ. իշխանութիւնը, Ազգ. Երեսփոխանական Ժողովը, Ազգ. Կրօնական ժողովը, Ազգ. Վարչութիւնը եւ անոր համարատու մարմինները, խորհուրդները, բոլոր միութիւնները, մարմինները, յանձնախումբերը եւ հայ ժողովուրդի զաւակները, բոլորին մաղթելով ամենաբարին եւ կատարեալը։ Ան աղօթեց, որ խաղաղութիւն հաստատուի երկրի վրայ եւ համերաշխութիւն տիրէ մարդոց միջեւ, որպէսզի սէրը գործնականապէս ապրինք։
Աւարտին, դպրաց դասը Ս. Ծննդեան շարականներ երգեց, որուն ընթացքին Սրբազան Հայրը ընդունեց ժողովուրդի զաւակներուն շնորհաւորութիւնները: Ապա, Մակար Սրբազան թափօրով ուղղուեցաւ դէպի եկեղեցւոյ շրջափակ, ուր ՀՄԸՄ-ի փողերախումբը հայրենասիրական երգեր նուագելով տօնական մթնոլորտ ստեղծեց։
Աւարտին, Կրօնական Ժողովին կողմէ աղօթքի պատկերազարդ բացիկներ բաժնուեցան ժողովուրդի զաւակներուն։
Քրիստոս ծնաւ եւ յայտնեցաւ. Օրհնեալ է յայտնութիւնն Քրիստոսի։ Ձեզի մեզի մեծ աւետիս:
