Գնդապետ Էօզ չի յիշեր

ՈՒՅԿԱՐ ԿԻՒԼԹԵՔԻՆ

4եւ 5 Դեկտեմբեր թուականներուն Իսթանպուլի 14-րդ եղեռնադատ ատեանի մէջ շարունակուեցաւ Հրանդ Տինքի սպանութեան հերթական դատավարութիւնը։ Այս նիստին ներկայ գտնուեցան ձերբակալեալ եւ ոչ ձերբակալեալ ամբաստանուածները եւ իրաւապաշտպաններ։ Դատավարութեան թղթածրարը կ՚ընդգրկէ 85 ամբաստանեալներ, որոնցմէ 10 փախստական են, իսկ 16-ը ձերբակալուած։

Դատավարութեան ընթացքին ամբաստանեալները կը մեղադրուին ոճիրէն առաջ այս մասին կատարուած նախապատրաստութիւնները, զէնք ապահովելու փորձերը, Իսթանպուլի մէջ Հրանդ Տինքի բնակարանին մօտ եւ «Ակօս» թերթի շրջակայքը վայրի ուսումնասիրութիւններ կատարուելը, Հրանդ Տինքի լուսանկարին վրայ սերտողութիւն կատարուելը գիտնալով հանդերձ ոչ մէկ կանխամիջոցի դիմելու մեղադրանքով։ Նշենք, որ այստեղ մեղադրուած Ոստիկան զօրաց պաշտօնեաները նաեւ կը մեղադրուին ՖԷԹԷՕ-ի աղանդին անդամակցելով։ 5 Դեկտեմբերի նիստին Տրապիզոնի ոստիկան զօրաց նախկին հրամանատար գնդապետ Ալի Էօզ ինքզինք պաշտպանեց ըսելով, որ չի յիշեր Հրանդի սպանութեան մասին իրեն ուղղուած զգուշացումները։ «Ո՛չ Տինքը կը ճանչնամ, ոչ ալ իր թերթին մասին լսած եմ։ Նոյնպէս չեմ ճանչնար Եասին Հայալը եւ միւսները։ Տինքի սպանութեան մասին տեղեկութիւն ունենալնին յայտնող անձնակազմը նաեւ կը պնդէ, որ այդ տեղեկութիւններ փոխանցած են իրենց հրամանատարներուն։ Այս նիւթը չէ խօսուած։ Եթէ նման լրատուութիւն մը ստացան իրենց վիճակած պարտականութիւններն են։ Պէտք էր տեղեկագիր պատրաստէին եւ փոխանցէին իրենց պետերուն։ Այդ գործերը մասնաճիւղի պարտականութիւններն են։ Մասնաճիւղը անոր համար է, որ կայ։ Իմ յանցանքը այն է, որ պէտք եղածէն աւել իվստահած եմ մասնաճիւղին։ Ստուգումի մէջ թերացած եմ։ Յետին նպատակ չեն ունեցած, բայց այդ տեղեկութիւնները գործադրութեան չդրուելով ոճիրը իրականացած է»։

Իսկ 4 Դեկտեմբերի դատավարութեան դարձեալ Տրապիզոնի ոստիկան զօրաց հրամանատարութեան անձնակազմէն Էրկիւն Եորուլմազ պնդեց, որ Տրապիզոնի Մաչքա գաւառին մէջ պատահած դէպքի մը մասնակցած փախստականը ձերբակալելու համար եկած են Իսթանպուլ։ Ան այսպէսով մերժեց Հրանդ Տինքի բնակարանին մօտ ստուգումներ կատարած ըլլալու մասին իրեն ուղղուած մեղադրանքը։ Միւս կողմէ Տրապիզոնի ոստիկան զօրաց լրաքաղութեան բաժնի տնօրէն Մեթին Եըլտըզը, այս մասին թերացումով մեղադրեց գնդապետ Էօզը՝ պնդելով, որ այս վերջինը անփոյթ մնացած է իր կողմէ ալ փոխանցուած լրատուութեան հանդէպ։

Բաժանորդագրուէ!

Դուք կարող էք աջակցիլ «Ակօս»ին՝ բաժանորդագրուելով։ Բաժանորդագրուեցէք, նուիրէք կամ թողէք բաժանորդագրութիւն հետաձգուած։