Խտրականութիւնը մահ կը սպառնայ
Քորոնա ժահրի վարակի կարեւորագոյն թիրախները կը հանդիսանան բանտերը, ուր մարդիկ կը գտնուին հաւաքաբար եւ շատ խնդրայարոյց է անհատական կանխամիջոցները։ Այս իրողութիւնը նկատի ունենալով զանազան երկիրներ որոշած են ժամանակաւոր կերպով տուն ղրկել բանտարկեալները, մինչեւ վարակի աւարտին հասնիլը։
Թուրքիա ինչպէս զանազան գետիններու վրայ այս նիւթին մէջ ալ փորձեց վարակը առիթի մը վերածելու եւ այսպէսով ալ իր ծրագրած, բայց ցարդ կեանքի չկոչած զանազան խնդիրներուն լուծում մը գտնելու համար։ Ծանօթ իրողութիւն է, որ Ազգային Շարժում կուսակցութեան առաջարկած ներման օրէնքը բանավէճերու առիթ տուած էր Խորհրդարանի մէջ։ Այժմ իշխանութիւնը առիթէն կ՚օգտուի նոյն ծրագիրը բոլորովին տարբեր պատրուակներով կրկին անգամ օրակարգի բերելու համար։ Այս անգամ խօսքը ոչ թէ ներման մասին է, այլ բանտարկեալներու կեանքի անվտանգութիւնը ապահովելու մասին։ Սակայն հոս եւս կը յայտնուի խտրականութեան պատկերներ, քանի որ կառավարութիւնը պատիժներու զեղչման միջոցաւ կ՚ուզէ ազատ արձակել սովորական յանցագործները, զանց առնելով քաղբանտարկեալները։ Այս անհաւասարութիւնը բնականաբար ընդվզում յառաջացուցած է հասարակութեան մօտ եւ բազմաթիւ հասարակական կազմակերպութիւններ իրենց առարկութիւնը ներկայացուցած են կատարուածին հանդէպ։
Արդարեւ նոր կանոնագրութիւնը կը միտի բանտի պայմաններուն տակ պահել բազմաթիւ քաղբանտարկեալներ երբ անդին ազատութիւն կը շնորհէ բազմաթիւ յանցագործներու, որոնք մեղադրուած էին ծանր յանցագործութիւններով։
Բանաձեւ նոյնութեամբ անցած է Խորհրդարանի արդարութեան յանձնախումբէն եւ եկած է ընդհանուր ժողովի օրակարգին։
Ըստ երեւոյթին այս հանգրուանն ալ դիւրաւ պիտի յաղթահարուի շնորհիւ իշխանութեան տիրացած ձայներու մեծամասնութեամբ։
