Խախտում՝ մարդու իրաւունքներու
2015 թ. Յունիսի 19-ին Ազատութեան հրապարակի վրայ կայացաւ «Ո՚չ թալանին» նախաձեռնութեան՝ ելեկտրական հոսանքի թանկացման դէմ ուղղուած ցոյցը։ Ցուցարարները կը պահանջէին չեղեալ յայտարարել Հանրային ծառայութիւնները կարգաւորող յանձնաժողովի՝ ելեկտրական հոսանքի սակագինը 6.93 դրամով բարձրացնելու մասին Յունիսի 17-ին որոշումը։ Նախատեսուած երթի փոխարէն սկսաւ նստացոյց՝ ոստիկաններու հնարաւոր բախումներէն խուսափելու համար (ոստիկանները տարածք բերած էին ջրցան մեքենաներ)։ «Ո՛չ թալանին» նախաձեռնութեան անդամները յայտարարեցին, որ իրենք մինչեւ երկուշաբթի, ժամը 19.00 նստացոյց կը կատարեն, իսկ եթէ իրենց պահանջը չբաւարարուի, երկուշաբթի երթով կը շարժուին դէպի Բաղրամեան 26՝ նախագահի նստավայր եւ այնտեղ կը ներկայացնեն իրենց պահանջները։ Ոստիկանները նախ յայտարարեցին, որ ժամը 23-էն ետք նստացոյցը արտօնուած չէ, սակայն կազմակերպիչներու հետ բանակցութիւններէն ետք թոյլատրեցին շարունակել նստացոյցը՝ տարածքը չաղտոտելու եւ վրաններ չտեղադրելու պայմանով։
2015 թ. Յունիսի 22-ի երեկոյեան ցուցարարները շարժման անցան դէպի նախագահական նստավայր, ուր շարունակեցին նստացոյցը։ Երեւանի փոխ ոստիկանապետ Վալերի Օսիպեանը Յունիսի 23-ին ժամը 5.20-ին յայտարարեց, որ նստացոյցի մասնակիցներու գործողութիւնները ապօրինի են։ Հերթական նախազգուշացումէն եւ ցուցարարներուն 10 րոպէ ժամանակ տրամադրելէ ետք ոստիկանները սկսան ցոյցը ցրելու նպատակով օգտագործել ջրցան մեքենաները։
Քաղաքացիական հագուստով ոստիկանները կը յարձակէին լրագրողներու վրայ ու կը ջարդէին, կը բռնագրաւէին տեսանկարահանող գործիքները, տեսանկարահանող սարքերու չիփերը։ Մասնաւորապէս գրանցուած են հետեւեալ դէպքերը։
Դաժան բռնութեան եւ ծեծի ենթարկուած են www.1in.am-ի նկարահաններ Կարէն Չիլինգարեանը, Յովսէփ Յովսէփեանը եւ Գոռ Յովհաննիսեանը, շարքէ հանուած են վերջինիս աշխատանքային թուային տեսախցիկն ու ուղիղ եթերի սարքը։
«Գալա» հեռուստատեսութեան լրագրող Փայլակ Ֆահրադեանը ոստիկաններու հարուածներէն վնասուածքներ ստացած է ձեռքերուն ու պարանոցի շրջանին, ան բռնի կերպով հսկողութեան տակ առնուած է։
Epress.am-ի նկարահան Տիգրան Յակոբեանը մահակով հարուած ստացած է գլխուն, որմէ ետք հսկողութեան տակ առնուած է ոստիկանութեան Կենտրոնի բաժինը, իսկ նկարահան Տիգրան Խաչատրեանին հայհոյած են եւ քաշքշած՝ խլելով տեսախցիկը, Epress.am-ի երեք տեսանկարահանող սարքերը ջարդուած են։
iLur.am-ի թղթակից Յակոբ Կարապետեանը հսկողութեան տակ առնուած է, իրմէ վերցուցած են ֆոթոխցիկը, հանած՝ յիշողութեան քարտը եւ վերադարձուցած։
Հսկողութեան տակ առնուած է նաեւ NEWS.am-ի ֆոթոլրագրող Արսէն Սարգսեանը, թղթակից Աիդա Յովհաննիսեանի ձեռքէն ուժով քաշած եւ տարած են տեսախցիկը։
«Հետքի» լրագրողներ Անի Յովհաննիսեանը եւ Հրանդ Գալստեանը հսկողութեան տակ առնուած են եւ տարուած Կենտրոն բաժանմունք։
Ջարդուած է «Ազատութիւն» ռատիոկայանի տեսախցիկներէն մէկը, ինչպէս նաեւ լրագրողի հեռախօսը, որուն հետ ան կը փորձեր տեսանկարահանել, իսկ ոստիկանութեան Նոր-Նորքի բաժնի սպան հրելով շէնքէն դուրս հանած է «Ազատութիւն» ռատիոկայանի նկարահանող խումբը։
Բաղրամեան պողոտայի նստացոյցը ցրելու ընթացքին բռնի ուժի գործադրմամբ բաժիններ տարուած են 237 հոգի։ Հսկողութեան տակ առնուած եւ աւելի ետք մէկ մասը ազատ արձակուած, 36 անձեր տեղափոխուած են հանրապետական նարկոլոգիական կլինիկ՝ բժշկական փորձաքննութեան համար։
Յունիսի 23-ին (ժամը 11.30 դրութեամբ) Առողջապահութեան նախարարութիւնը տեղեկացուցած է, որ Յունիսի 23-ի լուսաբացին զանգուածային միջոցառման ժամանակ շտապ օգնութեան ծառայութեան դիմած են 25 անձ, որոնցմէ 15-ը հիւանդանոց տեղափոխուած են տարբեր մարմնական վնասուածքներով։
Գլխաւոր դատախազութիւնը յայտարարութիւն տարածած է, ուր կ՚ըսուի թէ, 2015 թուականի Յունիսի 22-ի լոյս 23-ի գիշերը՝ սկսած ժամը 19.30-էն տեւական ժամանակ մի խումբ անձինք, անօրինական հաւաք, երթ, ապա նաեւ նստացոյց կազմակերպելով Երեւան քաղաքի Բաղրամեան պողոտայի վրայ խախտած են հասարակական կարգը։ Յարուցուել է քրէական գործ՝ ՀՀ քրէական օրէնսգիրքի 258-րդ յօդուածի 1-ին մասով՝ խուլիգանութեան յանցակազմի յատկանիշներով։ 22.06.2015թ. քրէական գործը ուղարկուած է ՀՀ քննչական կոմիտէ՝ նախաքննութիւն կատարելու համար։ Ոստիկանութեան կողմէ հսկողութեան տակ առնուած անձերէ ՀՀ քննչական կոմիտէի քննիչներու կողմէ հարցաքննուած են շուրջ 40 անձ, կարգ մը անձերու հարցաքննութիւնները ընթացքի մէջ են։ Նշանակուել են դատաբժշկական, նիւթագիտական եւ քրէագիտական փորձաքննութիւններ։
ՀՔԱ Վանաձորի գրասենեակը ոստիկանութեան գործողութիւնները դատապարտող յայտարարութիւն տարածած է, ինչպէս նաեւ իրաւաբանական աջակցութիւն կը տրամադրէ ոստիկանութեան այդ գործողութիւններէ տուժած անձերուն։
