«Քարերու Պատմութիւնը» ներկայացում
Գնալը Կղզիի Ս. Գրիգոր Լուսաւորիչ Եկեղեցւոյ մէջ, 12 Յուլիս 2024, Ուրբաթ իրակուն, տեղի ունեցաւ «Քարերու Պատմութիւնը» խորագեալ ներկայացումը, ԱՄՆ-ի Փասատենա քաղաքէն արձակուրդի համար ժամանած Նորայր Տատուրեանի կողմէ:
Հանդիսութեան գլխաւորեց Ն.Ա.Տ. Սահակ Բ. Պատրիարք Հայրը, իր մօտն ունենալով Իշխանաց Կղզեաց Հոգեւոր Հովիւ՝ Հոգշ. Տ. Յարութիւն Վրդ. Տամատեանը։ Հանդիսութեան մասնակցեցաւ մշակութասէր հասարակութիւնը, ինչպէս նաեւ եկեղեցւոյ թաղային խորհուրդէ անդամներ։
Սեւան Աթաօղլու բարի գալուստ մաղթեց ներկաներուն եւ ներկայացուց նախկին Պոլսահայ Նորայր Տատուրեանը, որ երկար տարիներ առաջ ԱՄՆ հաստատուած ըլլալով, այնտեղ ունի կրթական ու մշակութային ծառայութիւն։
Ապա Տատուրեան տեղեկութիւններ փոխանցեց Փասատենայի մէջ իր ունեցած նախաձեռնութիւններուն մասին։ Ըսաւ որ ներկայացումը նախ կատարուած է իր քաղաքին մէջ։ Այնուհետեւ «Քարերու Պատմութիւնը» ներկայացումով տեղեկութիւններ փոխանցեց Հայաստանի պատմամշակութային քանի մը արժէքներու մասին, որոնց մէջ լսելի դարձան Հայրավանքի, Հաղարծինի Վանքի, Նորավանքի, Յովհանավանքի նման կոթողներու պատմուածքները։ Ներկայացուեցան նաեւ Չարենցի Կամարի, Քարերու համանուագի նման մշակութային այլ կոթողներ։
Ներկայացումէ յետոյ երիտասարդներ հակիրճ ընթերցանութիւններ ըրին, ապա Լիլիան Աւիթօղլու դաշնակով նուագեց հայերէն երգեր ու ներկաներ միացան երգեցողութեան։ Ներկաներու փափաքով Տատուրեան խտացեալ ձեւով ներկայացուց նաեւ Հայկական տաղաչափութեան մասին իր բանախօսութիւնը, որ քանի մը շաբաթներ առաջ ներկայացուած էր։
Հանդիսութեան աւարտին մեր Հոգեւոր Պետը շնորհաւորեց Տատուրեանի աշխատութիւնը եւ յաջողութիւն մաղթեց իր ապագայ գործունէութեանց մէջ։ Նորին Ամենապատուութիւնը ուրախութիւն յայտնեց նաեւ, որ մշակութային նման ձեռնարկներ կը կազմակերպուին Գնալը Կղզիին մէջ։ Ապա, ի յիշատակ այս այցելութեան Տատուրեանին յանձնեց յուշանուէր մը։ Ներկաներ եկեղեցւոյ պարտէզը ունեցած մտերիմ զրոյցի պահ։
Տատուրեանի սոյն ներկայացումը կրկնութիւնն էր երկու շաբաթ առաջ Սայաթ Նովա Երգչախումբի նախաձեռնութեամբ կատարուած ներկայացման։
