Քաղաքացիներ բժշկական փորձի առարկայ դարձան
ՏԵՄ կուսակցութեան Տիյարպեքիրի պատգամաւորները բաւական ցնցիչ պնդումով մը Խորհրդարանի օրակարգին բերած են համավարակի շրջանին Տիյարպեքիրի մէջ քաղաքացիներու բժշկագիտական փորձի մը առարկայ դառնալուն խնդիրը։ Խորհրդարանի ներկայացուած պատումը հիմնուած է Տիճլէ Համալսարանի Բժշկական ֆակուլտետի դասախօս փրոֆ. Ճենապ Էքինճիի պնդումներուն վրայ։
Էքինճի կ՚ըսէ թէ Կազի Եաշարկիլի անուան հիւանդանոցի մէջ հիւանդներու վրայ փորձուած է թրքական արտադրութիւնով շողարձակման սարք մը, որու հետեւանքով մահացած են կարգ մը հիւանդներ։ Փրոֆ. Էքինճի այս մասին գրառումներ ունեցած է իր սոցցանցի X հաշուին վրայ 8 Յուլիս 2024 թուականին։
Ան կը պնդէ թէ 27 Յունիս 2020 թուականին յատուկ ինքնաթիռ մը վայրէջք կատարած է Տիյարպէքիրի օդակայանը։ Ինքնաթիռի ճամբորդներն էին կուրծքի հիւանդութեանց մասնագէտ դասախօսի մը գլխաւորած հինգ բժիշկներ եւ երկու պաշտօնեայ։ Խումբը դիմաւորուեցաւ Տիյարպեքիրի կուսակալութեան անձնակազմին կողմէ եւ ուղղուեցան դէպի Կազի Եաշարկիլ Հիւանդանոց։
Անոնք այստեղ դիմաւորուած են քաղաքի առողջապահութեան տնօրէնի եւ բժշկապետի կողմէ։
Էքինճիի պնդումներով այս խումբը եկած էր իբրեւ թէ Քովիտ 19-ի ժահրը առանց դեղորայքի դարմանել խոստացող սարքը փորձելու համար։
Թուրքիոյ Առողջապահութեան Նախարարութիւնը մերժած էր «Թրքական գիւտ» ըլլալով ներկայացող այս սարքը գնել, քանի որ ան չէ անցած համապատասխան փորձի ընթացք։
Էքինճի կը յաւելէ թէ եկող խումբին մաս կը կազմէր Մ.Ս. անուն անձ մը, որ մերձաւորն էր նախկին ներքին գործոց նախարարին։ Այս անձը կը յամառէր սարքին փորձի իմաստով շահագործումը ապահովելու համար։
Վերջապէս Կազի Եաշարկիլ Հիւանդանոցի բժշկապետը յօժարեցաւ այդ առաջարկին եւ սարքը առանց հիւանդներու եւ անոնց մերձաւորներուն բացատրութիւն տալու երեք օր շահագործուեցաւ հիւանդներու վրայ, որու հետեւանքով մահացան բազմաթիւ հիւանդներ։
ՏԵՄ կուսակցութեան պատգամաւորները այս մասին հարցումնագիր մը ուղղեցին Առողջապահական Նախարարին։
Մինչ այդ Տիյարպեքիրի Բժիշկներու Կաճառն ալ իսկոյն դատական եւ վարչական հետաքննութիւն պահանջեց այս պնդումներուն համար։
