Ժահրը մեզմէ խլեց Պատրիկ Տեւեճիեանը
Երբ ամբողջ աշխարհի վրայ կը շարունակուի Քորոնա ժահրի պատճառած մահուան սարսափը, համաշխարհային հայութիւնն ալ այս շաբաթուայ ընթացքին ունեցաւ ծանր կորուստ մը, յանձին ֆրանսահայ իրաւաբան Պատրիկ Տեւեճիեանի։ Տեւեճիեան եւս վարակուած էր ժահրէն եւ կարճատեւ բուժման շրջանի մը աւարտին մահացաւ Փարիզի հիւանդանոցներէն մէկուն մէջ։
Տեւեճիեանի կորուստի առթիւ Հայաստանի աւագանին ցաւակցական գրութիւններով բաժնեց սուգը հայ ժողովուրդի արդարութեան մարտիկ Տեւեճիեանի ընտանիքին։ Լուրը արձագանգ գտաւ նաեւ թրքական կարգ մը թերթերուն մէջ, որոնք իրենց կարգին եւս ցաւակցութիւն յայտնեցին այս անգամ «ԱՍԱԼԱ»ի ոճիրներու հետեւանքով մահացած թուրք դիւանագէտներու ընտանիքներուն։
Պատրիկ Տեւեճիեան ճարտար իրաւաբանի կոչումի կողքին ունեցաւ քաղաքական կարեւոր ներդրում ֆրանսայի ընկերային կեանքի մէջ։ Այս իսկ պատճառաւ ֆրանսացիներ եւս կը սգան Պատրիկ Տեւեճիեանի մահը։
Հայ ժողովուրդի արդարութեան համար մղած պայքարի անխոնջ ռազմիկի կորոստը որքան ալ ծանր ըլլայ, նոյնքան պայծառ է իր թողած յիշատակը։
