«Իզ»ը գնահատանքի արժանացաւ
Ընկեր Թատերախումբը, իր հիմնադրութեան 20-րդ տարեդարձին առիթով բեմ վերադարձաւ «Իզ» (Հատք) անուն ներկայացումով։
Ահմեթ Սամի Էօզպուտաքի հեղինակած «Իզ» ներկայացման առաջին բեմադրութիւնը տեղի ունեցաւ Ապրիլ 29-ին՝ Երեքշաբթի երեկոյեան Օրթագիւղի Թարգմանչաց Վարժարանի սրահին մէջ։ Արաս Նասի թէ՛ խաղացած եւ թէ՛ բեմադրած «Իզ»ի կազմին մէջ կը գտնուին Արտէն Աքպաշ, Արէն Սաղպաշ, Արէն Սեմերճեան, Քլարա Սերա Ալթըփարմաք, Կարէն Նազարէթեան եւ Նատին Թաշ Մըղտըս։ Մէկ արարով, 85 վայրկեան տեւող տրամա ժանրի ներկայացումը հանդիսատեսներուն կողմէ գնահատանքով դիմաւորուեցաւ։
Ներկայացումը կը պատմէ 1950-ական թուականներուն ապրած եւ Սեպտեմբեր 6-7-ի դէպքերուն ընթացքին իրենց տուները լքելու հարկադրուած յոյն քոյրեր Մարքիզի եւ Էլէնիի, 1980-ական թուականներուն Սեպտեմբեր 12-ի դէպքերէն ետք փախչելու համար Թարլապաշիի մէջ նոյն տունը վարձակալող Ահմէտի եւ անոր սեւծովեան տանտէր Թուրկութ Ուսթայի, 2000-ական թուականներուն նոյն տան մէջ ապրող միասեռական Սեվենկիւլի եւ անոր սիրեցեալ Ռիզկարի տան մէջ ձգած հետքերն ու պատմութիւնները։
Ներկայացման աւարտին խօսք առնող Արաս Նաս շնորհակալութիւն յայտնեց հիւրընկալութեան համար Օրթագիւղի Սուրբ Աստուածածին Եկեղեցւոյ թաղականութեան եւ Թարգմանչաց Վարժարանին, ներկայացման հեղինակ Ահմէտ Սամի Էօզպուտաքին եւ իր խումբի ընկերներուն։ Էօզպուտաք իր խօսքին մէջ նշեց, որ գնահատանքով դիտած է ներկայացումը, իսկ Օրթագիւղի թաղականութենէն Արման Քոչաք յայտնեց, որ պիտի շարունակեն աջակցիլ մշակոյթին եւ արուեստին։
Ընկեր Թատերախումբի կողմէ Էօզպուտաքին եւ Օրթագիւղի թաղականութեան շնորհակալագիրեր տրուեցան։ Ներկայացումէն ետք Օրթագիւղի Եկեղեցւոյ սրահին մէջ հիւրասիրութիւն տեղի ունեցաւ։
«Իզ»ը Թարգմանչաց Վարժարանի բեմին վրայ պիտի ներկայացուի Մայիս 5, 8, 13, 22, 24 եւ 29 թուականներուն։ Ներկայացման հրաւիրատոմսերու համար կրնաք կապ հաստատել Արաս Նասի (0535 556 87 91) եւ Նատին Թաշ Մըղտըսի (0536 251 02 19) հետ։
