Հովուական այցելութիւն Էլազըղի եւ մալաթիոյ համայնքներուն
Ն.Ա.Տ. Սահակ Բ. Պատրիարք Հօր հրամանաւ եւ օրհնութեամբ, Բուն Բարեկենդանի առթիւ, Հաթայի եկեղեցեաց հոգեւոր հովիւ եւ գաւառի տեսուչ Արժ. Տ. Աւետիս Քհնյ. Թապաշեան, մեկնեցաւ Էլազըղ: Հովուական ուղեւորութեան ընթացքին, Տէր Հօր կ’ընկերանար Իսկենտէրունի Ս. Քառասուն Մանկունք Եկեղեցւոյ Ծխական Խորհուրդի ատենապետ Բրկ. Եուսուֆ Ուր. Դպ. Թապաշեան:
Տէր Հայրը 1 Մարտ 2025, Շաբաթ առաւօտուն, Էլազըղի Հայոց Գերեզմանատան Ս. Նշան Մատրան մէջ Ս. Պատարագ մատոյց, որու ընթացքին քարոզեց նիւթ ունենալով Բարեկենդանը, որ կը խորհրդանշէր դրախտի մէջի մարդու կեանքը: Տէր Հայրը ըսաւ թէ բարեկենդանը կը խորհրդանշէ Աստուծոյ հետ մեր ապրած կեանքը, շեշտեց անոր կարեւորութիւնը, իսկ մեզ այդ ուրախ կեանքէն հեռացնող ամէն ինչ մեզ մեղքի տանող ազդակներ են: Ան ըսաւ. «Բարեկենդանութիւնը կ’ըլլայ հաւատքով ու սիրով»:
Քարոզի վերջաւորութեան Տէր Հայրը ներկաներուն հաղորդեց Նորին Ամենապատուութեան հայրական օրհնութիւնները:
Ապա կատարուեցաւ պաշտօն՝ Էլազըղի մեր հաւատացեալ հանգուցեալներու հոգւոցն ի հանգիստ: Իսկ յաւարտ արարողութեանց՝ փակուեցաւ մատրան վարագոյրը ի նշան Մեծ Պահքի:
Հակառակ տիրող ցուրտին, արարողութեան մասնակցեցան տեղւոյն փոքրաթիւ հայ համայնքի անդամները, ինչպէս նաեւ Տիյարպաքըրէն ժամանած, տեղւոյն Ս. Կիրակոս Եկեղեցւոյ Ծխական Խորհուրդի անդամներէն Վոլքան Արատի գլխաւորութեամբ հաւատացեալներ:
Տէր Հայրը մէկտեղուեցաւ ու զրուցեց տեղւոյն մերազն ժողովուրդի անդամներուն հետ:
Յաջորդ առաւօտ՝ 2 Մարտ 2025, Կիրակի, Մալաթիոյ Հայոց Գերեզմանատան Ս. Յարութիւն Մատրան մէջ Ս. Պատարագ մատոյց, որու ընթացքին խրատական խօսեցաւ մեր կեանքին մէջ պահքի կարեւորութեան եւ մեր բարեփոխութեան համար սքանչելի առիթ ըլլալուն մասին: Մաղթեց, որ Բարեկենդանը օրհնութիւններ թող բերէ մեր կեանքերուն եւ առիթ ըլլայ Աստուծոյ ու մարդու մերձեցման: Տէր Հայրը ապա ներկաներուն հաղորդեց Նորին Ամենապատուութեան հայրական օրհնութիւնները:
Կատարուեցաւ պաշտօն՝ Մալաթիոյ մեր հաւատացեալ հանգուցեալներու, ի մասնաւորի քառասնօրեայ հանգուցեալ Վահէ Պենկիի հոգւոյն ի հանգիստ:
Եկեղեցական արարողութեան աւարտին փակուեցաւ մատրան վարագոյրը ի նշան Մեծ Պահքի:
Արարողութեանց մասնակցեցան տեղւոյն փոքրաթիւ հայ համայնքի անդամները:
Տէր Հայրը այստեղ եւս մէկտեղուեցաւ ու զրուցեց տեղւոյն մերազն ժողովուրդի անդամներուն հետ եւ իրենց մաղթեց առողջ ու օրհնութիւններով լի Մեծ Պահոց շրջան մը:
Նոյն իրիկուն, Տէր Հայրը եւ Բրկ. Եուսուֆ Ուր. Դպ. Թաշապեան ցամաքի ճամբով վերադարձան Հաթայ:
