Հրանդի անունը անմար կրակ մըն է արդարութիւն պահանջողներուն համար
Ինչպէս նախորդ տարիներուն այս տարի դարձեալ բազմահազար ժողովուրդ մէկտեղուած էին «Ակօս»ի նախկին խմբագրատան շէնքին առջեւ եւ ժամը ճիշդ 15.05-ին յիշատակեցին «Ակօս»ի հիմնադիր Հրանդ Տինքը։ Հանրահաւաքին ներկայ էին Հանրապետական եւ Ժողովուրդներու ժողովրդավարութեան կուսակցութեան պատգամաւորներ, հասարակական կազմակերպութիւններու ներկայացուցիչներ, «Շաբաթօրեայ Մայրեր»ը եւ Տինքի յիշատակը յարգող բազմահազար ժողովուրդ։ Այս տարուայ ուղերձը արտասանեց ինք ալ նման ոճիրի մը զոհ գացած արձակագիր Սապահատտին Ալիի դուստրը՝ Ֆիլիզ Ալի։ Ֆիլիզ Ալիի արտասանած ուղերձը կարելի է կարդալ «Ակօս»ի հայերէն էջերու վրայ։ Այս առթիւ բանտարկուած Սիլիվրիի արգելանոցէն իր ողջոյնի խօսքը կը փոխանցէր նաեւ Անատոլու քիւլթիւր ընկերութեան սեփականատէր Օսման Քաւալա։ Օսման Քաւալայի ուղերձը եւս տեղ գտած է հայերէն էջերու մէջ։
Բացի Իսթանպուլի միջոցառումներէն Հրանդ Տինք յիշատակուեցաւ նաեւ երկրի զանազան քաղաքներու եւ արտասահմանի մէջ։
Տիյարպէքիրի մէջ անյայտ կորածներու ընտանիքները իրենց հերթական հանրահաւաքին մէջ նշեցին նաեւ Հրանդ Տինքը։ Հոն եւս ներկայ էին ընդդիմադիր կուսակցութիւններու պատգամաւորներ եւ հասարակական կազմակերպութիւններու ներկայացուցիչներ։ Այս հաւաքոյթի ընթացքին ելոյթ ունեցան Մարդու Իրաւունքներու միութեան Տիյարպէքիրի մասնաճիւղի վարչութեան անդամ Հասան Եալչըն եւ Սուրբ Կիրակոս եկեղեցւոյ թաղային խորհուրդի անդամ Կաֆֆուր Թիւրքայ։
Իզմիրի մէջ Ժողովրդավարութեան եւ Աշխատանքային միաւորումներու կազմակերպած հանրահաւաքին պարզուեցաւ «Չենք հրաժարիր աղբարիք» գրուած վերտառութիւն մը եւ ժամը 15.05-ին տեղի ունեցաւ յոտնկայս յարգանքի պահ։
Անգարայի մէջ եւս տեղի ունեցան զանազան միջոցառումներ, թէ «Պիրկիւն» թերթի խմբագրատան առջեւ եւ թէ Մարդու Իրաւունքներու միութեան կեդրոնին մէջ։
Բացի այդ Հրանդ Տինք յիշատակուեցաւ նաեւ Տաթչայի, Գատըգիւղի մէջ։ Երկրէ ներս տեղի ունեցած այս հանրահաւաքներու կողքին, աշխարհի զանազան անկիւններու վրայ եւս կատարուեցան Հրանդը յիշատակելու ձօնուած տարբեր բնոյթով միջոցառումներ։ Այսպէս Միացեալ նահանգներու Լոս Անճէլըս եւ Նիւ Եորք քաղաքներէն, Գերմանիոյ Պերլին, Նիւնպերկ եւ Քոլոյն քաղաքներուն մէջ ալ տեղի ունեցան յիշատակման հանրահաւաքներ։
