Հարաւային Գալիֆորնիա դժոխքը կ՚ապրի
Հարաւային Գալիֆորնիոյ զանազան շրջաններուն մէջ Յունուար 7-ին ծայր առած եւ տակաւին շարունակուող հրդեհը պատճառ դարձած է տասնեակ հազարաւոր բնակիչներու տարհանման։ Այդ ծիրէն ներս՝ Ալթատինայի, Փասատինայի, Լա Գանիատայի, Գրեսենթա հովիտի եւ հիւսիսային Կլենտէյլի մէջ ապրող հազարաւոր հայ ընտանիքներ եւս հարկադրուած են իրենց բնակարանները լքելու։ Այս երեւոյթը պատճառ դարձած է աւազակութեան եւ գողութեան դէպքերու։
Տեղական իշխանութիւնները նման յանցագործութիւնները կանխելու համար դիմած են գիշերային ժամերուն փողոց ելլելու արգելքի դրութեան։
Մինչ այդ հրդեհէն վնասուած են նաեւ հայկական կարգ մը հաստատութիւններ։ Անոնց մէջ կը յիշուի Սահակ Մեսրոպ դպրոցը, որ հրոյ ճարակ դարձած էր հրդեհի առաջին օրն իսկ։
Հրդեհին վայրերուն մէջ գտնուող հայկական վարժարանները փակուած են։
Մեր պաշտօնակից «Ասպարէզ»ի համաձայն՝ Ազգային առաջնորդարանը յայտարարած է, թէ Փասատինայի, Կլենտէյլի, Մոնթեպելլոյի եւ Էնսինոյի իր եկեղեցիները բաց են՝ ընդունելու համար այն ընտանիքները, որոնք ենթարկուած են տարհանման: Արեւմտեան Ամերիկայի ՀՅԴ-ն եւս յայտարարած է, թէ խնդրոյ առարկայ շրջաններուն մէջ գտնուող իր կեդրոնները բաց են հրդեհին պատճառով ապաստանի կարիք ունեցողներուն առջեւ։ Միւս կողմէ Քարտաշեան ընտանիքն ալ մասնակցած է մարդասիրական արշաւին, յատկապէս սնունդ ապահովելով աղէտեալ ժողովուրդին։
Յունուար 14-ին, ըստ վերջին հաշուեկշիռի մը՝ կար առնուազն 26 մեռեալ։
Նկատի ունենալով անյայտ կորածներու մասին ոստիականութեան հասած դիմումները, իշխանութիւնները կը կանխատեսեն թէ մեռեալներու թիւը կրնայ բարձրանալ յառաջիկայ օրերուն եւս։
Միւս կողմէ հասարակութեան տարբեր շերտերէն բողոքներ ու դժգոհութիւններ կը լսուին հրդեհի դէմ պայքարի առումով։ Շատեր կը պնդեն թէ հրշէջները անպատրաստի գտնուած են նման աղէտի դիմաց։
Վերջապէս յայտնի դարձած է թէ բնութեան ազդակը գերակշիռ եղած է եւ ամէն ինչ կախեալ է քամիի սաստկութենէն, ուղիէն եւ յարատեւութենէն։
Հարաւ Գալիֆորնիոյ տարածքին տիրող աղէտը նիւթական ծանր վնաս մըն ալ պարզած է, լուրջ դժուարութեան մատնելով ապահովագրութեան ընկերութիւնները։
