Յանուն ժողովրդավարութեան գիտակցութեան
Հրանդ Տինք Հիմնարկի նախաձեռնութեամբ եւ Սահակեան Նունեան Վարժարանի Թ., Ժ. եւ ԺԱ. դասարաններու աշակերտութեան մասնակցութիւնով կայացած է «Ժողովրդավար Քաղաք» խորագրեալ աշխատանոնց մը գործադրութեան առաջին փորձը։ Այս ընթացքին մէջ աշակերտներ մտածելու, արտադրելու, լուծում առաջադրելու խմբովին իրաւունքներու հիման վրայ երկխօսութեան, փոխընկալման եւ ժողովրդավար սկզբունքներով որոշում կայացնելու ունակութիւններ ապահովեցին։ Ստորեւ կը ներկայացնենք աշակետներու այս աշխատանոցի մասին տպաւորութիւնները
Ժողովրդավարութեան խաղը շատ հաճելի էր։ Մեր ընկերներուն հետ երեւակայական քաղաքներ յառաջ բերինք եւ այդ քաղաքներու կանոնները որոշեցինք։ Քաղաքի կառավարիչները օրէնքներ ճշդեցին եւ ճարտարապետները շէնքեր շինեցին։ Կառավարիչները իրենց միջեւ գաղափարի փոխանակումներ ըրին եւ իրենց կարծիքները արտայայտեցին։ Ի վերջոյ ճարտարապետները շէնքերը միացուցին եւ խոշոր երկիր մը կազմեցինք։
ՄԱՍԻՍ ԹՕՓՈՒԶՕՂԼՈՒ
***
Ես այս գործունէութիւնը շատ օգտակար գտայ։ Հասկցայ, որ բոլորս հաւասարութեան եւ արդարութեան կը հաւատանք։ Հաւասարութեան եւ արդարութեան կարեւորութիւնը հասկնալու համար շատ լաւ խաղ մըն էր։ Եթէ բոլորս իրարու հաւասար ըլլանք կրնանք լուծել մեր հարցերը։ Այսպիսի գործունէութիւնները պէտք է յաճախ ընել, որ կարենանք յառաջդիմել Թուրքիոյ մէջ։
ՍԱՌԱ ԿԱԶԷՐՕՂԼՈՒ
***
Այս խաղը խաղացած ատեն հաճելի ժամանակ անցուցի։ Նոյնիսկ ուզեցի աւելի երկար տեւէ։ Ընկերներուս հետ խումբ կազմելով ջանացինք մեր քաղաքին համար ամէնէն լաւը ընտրել։ Շնորհակալութիւն կը յայտնեմ Հրանդ Տինք Հիմնարկի այս աղուոր խաղին համար։
ՆՈՒԷՐ ԶԷՔԻ
***
Անցեալ շաբաթ՝ մեր դպրոցի մէջ հիւրասիրեցինք Հրանդ Տինք Հիմնարկէն անդամներ, որոնք մեզի «Ժողովրդավար Քաղաքէ խաղը պիտի սորուեցնէին։ Խաղին մէջ կազմեցինք մեր կուսակցութիւնը, որ ունէր իր անունը, նախընտրութիւնները եւ կարգախօսը։ Իրարու հետ մեր մտածումները բաժնելով վիճաբանեցանք։
Ըստ իս, շատ արդիւնաբեր գործունէութիւն մըն էր. մեր գաղափարները արտայայտեցինք եւ վիճաբանութեամբ լաւ արդիւնքի հասնիլ ջանացինք։ Նաեւ մեր ընկերներուն հետ լաւ ժամանակ անցուցինք։
ԺՈՒԼԻԱ ԳԱՓ
***
Վարժարանիս գրադարանը մեր ուզած տեղերը նստանք։ Հրանդ Տինք հիմնարկէն եկող պաշտօնեաներ պատմեցին այս այցելութեան պատճառը։
Մեզի տրուած առաջին թուղթին վրայ քաղաքի մը պէտք ունեցած 16 յատկանիշերը կային, որոնք պիտի շարէինք ամենակարեւորէն դէպի աւելի քիչ կարեւորը։ Քիչ ետք մեզի կրկին երկու հատ թուղթ բաժնուեցաւ։ Այս թուղթերուն վրայ մեր խումբին անունը եւ զինանշանը կուսակցութիւն մը կազմելով գրեցինք։ Մեզի տրուած կէս ժամուան մէջ պէտք էր կուսակցութեան անդամներուն պաշտօնները որոշել. ինչպէս քարտուղար, նախագահ, խօսնակ, ճարտարապետ եւ ծրագրող։ Ետքը բոլոր կուսակցութիւնները հաւաքուելով սկսանք մեր գրածները պատմել։ Երկու վայրկեան պատմելու համար տրուած ժամանակէ ետք միւս կուսակցութիւնները հարցումներ հարցուցին մեզի եւ մեր պատասխանները ստացան։ Կազմուած չորս կուսակցութիւնները իրենց պաշտօնները կատարեցին։ Վերջը մեր քաղաքներուն տեղաւորուելու համար վեց հատ շէնք զատեցինք։ Ետքը քաղաքին մէջ դրամի մասին խնդիր մը ծագեցաւ եւ զատուած շէնքերէն երեք հատը ձգելու ստիպուեցանք։ Խօսնակը եւ ճարտարապետը շէնքերու կարեւորութեան պատճառը պատմեցին։ Ի վերջոյյ քաղաքին անուն մը տալով խաղը լմնցուցինք։
ՕԼԻՎԻԱ ԱՉԸՔԿԷՕԶ
***
Ինծի համար, այս գործունէութիւնը մեզի գաղափար մը տուաւ քաղաքականութեան եւ տնտեսագիտութեան մասին, նաեւ բանավիճելու եւ մեր ընտրութիւնները ճիշդ ընելու համար մեզի օգնական եղաւ։ Խումբի աշխատութիւն ընել եւ բոլոր մարդոց գաղափարները մտիկ ընել սորուեցանք։
ՀԷԼԷՆԱ ՄԷԹԻՆ
***
Ժողովրդավար քաղաք մը ինչպէ՞ս կ՚ըլլայ։ Ամէն մարդ նոյն պայմաններու մէջ՝ առանց սեռի, կրօնքի եւ ազգի խտրութեան եթէ ապրի կարելի է։ Ընկերներուս հետ այսպիսի քաղաք մը երեւակայեցինք։ Հետաքրքրական էր, որ մեզմէ ոչ մէկը շարժանկար, թատրոն, կամ նման զուարճանալի տեղերու մասին մտածեց։ Ամէն խումբ ուզեց որ իր ժողովրդավար քաղաքին մէջ արդարութիւն, հաւատք, առողջութիւն... ըլլայ։ Ուրեմն մեր ապրած քաղաքին մէջ՝ մենք ասոնք չունինք եւ ասոնց կարօտը ունինք։
ԳԱՅՐԱ ԹՕԲԱԼՄԸՂՏԸՍ
