Համասեան երաժշտութիւնով կը հատէ սահմանները
Հայաստանի առաջնակարգ երաժիշտներու կարգին կը դասուի ծանօթ ճազի դաշնակահար Տիգրան Համասեանը։ Ան վերջերս ձեռնարկած է հիւրահամերգներու ծրագրին, որ ունի նաեւ ուխտագնացութեան բնոյթ։ Համասեան որոշած է աշխարհի վրայ հարիւր եկեղեցիներու կամարներու ներքեւ հնչեցնել Կոմիտասեան մեղեդիները եւ հայ ժողովուրդի պատմական տաղերը։
Հայաստանի առաջնակարգ երաժիշտներու կարգին կը դասուի ծանօթ ճազի դաշնակահար Տիգրան Համասեանը։ Ան վերջերս ձեռնարկած է հիւրահամերգներու ծրագրին, որ ունի նաեւ ուխտագնացութեան բնոյթ։ Համասեան որոշած է աշխարհի վրայ հարիւր եկեղեցիներու կամարներու ներքեւ հնչեցնել Կոմիտասեան մեղեդիները եւ հայ ժողովուրդի պատմական տաղերը։ Նման հեռապատկերով Թուրքիա այցելող Համասեան այդ ուխտի շրջագծով շատ մը համերգներ սարքեց պատմական Հայաստանի քաղաքներու մէջ։ Այսպէս ան այցելեց Կարս եւ Վան։ Անշուշտ որ խիստ յուզական էր Անիի աւերակներուն մօտ Հայաստանեան այս խումբի կատարումները։ Ինչպէս որ պիտի ըսէր բանաստեղծը՝ «Տեսնեմ Անին ու նոր մեռնեմ» թերեւս շատերու համար այժմ կարելի է երազել «Լսեմ Անին ու նոր մեռնեմ»։ Այսպէս Անիէն ետք, Համասեան եւ իրեն ընկերակցող Հայաստանի Սենեկային երգչախումբը համերգ մըն ալ ունեցան Վանի Ախթամար կղզիի Սուրբ Խաչ Եկեղեցւոյ կամարներուն տակ։ Տակաւին հիւրահամերգները պիտի շարունակուին Տիյարպէքիրի, Կեսարիոյ, Վաքըֆգիւղի եւ Իսթանպուլի մէջ։ Ընդհանուր առմամբ «Լոյս ի լուսոյ» խորագրով ներկայացուած նախագիծը աւելի ետք իր երթը պիտի շարունակէ Եւրոպայի, Ասիոյ եւ Միջին Արեւելքի զանազան քաղաքներու մէջ եւս։ Կ՚արժէ նշել որ համերգները տարբեր քաղաքներու մէջ տարբեր տպաւորութիւններու տեղի կու տան։ Այսպէս երբ Վանի մէջ Համասեանի ծրագիրը կ՚ողջունուէր տեղւոյն քաղաքական իշխանութիւններու կողմէ, անոնց պաշտօնակիցները չէին վարաներ իրենց դժգոհութիւնը արտայայտելու այդ նոյն միջոցառումներու մասին։ Սակայն այդ բոլորը նշանակութիւն ալ չունին, քանի որ Համասեանի մտահոգութիւնը այս պահուն ալ որեւէ մէկուն գոհունակութեան հետ կապ չունի։ Ան ճշդած է իր ուղին եւ կը յառաջանայ հետապնդելով որոշ նպատակ։
