Համայնքային ընտրութիւնները դատական լաբիւրինթոսի մէջ
Փոքրամասնութիւններու պատկանող հիմնարկներու վարչութեան ընտրութիւնները դասաւորող կանոնագիրը բարելաւելու պատճառաբանութեամբ առկախուած էր 2013 թուականին։ Վաքըֆներու ընդհանուր Տնօրէնութիւնը անցնող ութը տարիներու ընթացքին չէր յաջողած նոր կանոնագիր մը պատրաստել։
Հայ համայնքէն երեք անհատներ իրենց իրաւապաշտպաններ՝ Սեպուհ Ասլանկիլի եւ Սեդրակ Տաւութհանի միջոցաւ դատ բացին Վաքըֆներու Ընդհանուր Տնօրէնութեան դէմ։ Անգարային Եօթերորդ Վարչական Ատեանը իրաւացի գտաւ բողոքարկուներու դիմումը եւ չեղեալ համարեց տնօրէնութեան գործողութիւնը։
Վաքըֆներու Ընդհանուր Տնօրէնութիւնը այս որոշումին դէմ բողոքեց Բողոքարկու Ատեանին մօտ, սակայն իր այդ դիմումը եւս մերժուեցաւ։ Այսպէսով բացուած եղաւ ընտրութիւնները կայացնելու ճանապարհը։ Հայ համայնքի չորս հաստատութիւններ դատական որոշումին յենելով Վաքըֆներու Ընդհանուր Տնօրէնութեան տեղեկացուցին 3 Հոկտեմբեր 2021 թուականին խնամակալական ընտրութիւններ կատարելու մասին իրենց կամքը։
Այս հանգրուանին Բողոքարկու Ատեանը չեղեալ համարեց Անգարայի Եօթերորդ Վարչական Ատեանի վճիռը պատճառաբանելով թէ, այդ դատարանը իրաւասու չէ նման վճիռ արձակելու եւ դատը պէտք է քննարկուի Գերագոյն Ատեանի մէջ։
Իրաւապաշտպան Սեդրակ Տաւութհան 26 Յունիս շաբաթ օր, «Ռատիօ Ակօս» հաղորդումին մասնակցելով բացատրութիւններ տուաւ կատարուածին մասին։
Ան նշեց որ դատարաններու միջեւ տարակարծութիւնը կը գոյանայ օրէնքները եւ անոնց գործադրութիւնը մեկնաբանելու տարբերութենէն։ «Այս պահուն Բողոքարկու Ատեանին առարկութիւնը ոչ թէ հիմնական, այլ ձեւական բնոյթ ունի։ Վերջապէս ընտրութիւն ընելու կամ չնելու մասին որեւէ ակնարկութիւն չկայ։ Գիտենք որ Սուրբ Խաչ Դպրեվանք, Կեդրոնական, Գարակէօզեան եւ Գալֆայեան վարժարաններու վարիչները արդէն իսկ ձեռնարկած էին ընտրութեան նախապատրաստութիւններուն։ Կարգ մը շրջանակներ քննադատած էին այդ որոշումը։ Հիմա պիտի սպասենք Գերագոյն Ատեանի որոշումը»։
Սեդրակ Տաւութհան մեղադրեց նաեւ «Ընտրութիւն չէք կրնար ընել», «Ընտրութիւնները ջնջուեցան», «Չէք կրնար պետութեան դէմ հակաճառել» արտայայտութիւնները։ Ան աւելցուց որ սահմանադրական իրաւունքներու գործածութիւնը կարելի չէ այսպէս մեկնաբանել։
Միւս կողմէ ընտրութեան որոշում կայացուցած համայնքային չորս հաստատութիւնները ուշադրութեամբ կը քննարկեն զարգացումները եւ կը պատրաստուին այդ զարգացումներու զուգահեռ նոր քայլերու դիմելու։
