Հայաստանի մէջ արտակարգ իրավիճակը կը շարունակուի մինչեւ 13 Յունիս

Հայաստանի հանրապետութիւնը եւս անմասն չէ մնացած համավարակի կործանիչ ազդեցութենէն։ Հայաստան ալ Թուրքիոյ նման 11 Մայիսին փորձած էր կանխամիջոցները որոշ չափով թուլացնել։ Սակայն շուտով պարզուեցաւ, որ այդ թուլացումը իսկոյն անդրադարձ ունեցած է տուեալներու վրայ։ Արդարեւ 18 Մայիսի ցերեկուայ ժամերուն արձանագրուեցաւ վարակման 351 դէպքեր, որը մրցանիշ կը համարուի Հայաստանի համար։ Այսպէսով Հայաստանի մէջ վարակուածներու ընդհանուր թիւը հասաւ 4822-ի։ Մինչեւ օրս թեստաւորուած է 41 հազար 950 անձ։ Բուժուածները կը հաշուին 2718 եւ մինչեւ օրս մահացողները 61 անձ։

Վարչապետ Փաշինեան յայտարարեց թէ համավարակի դէմ արտակարգ միջոցները ի զօրու պիտի ըլլան մինչեւ 13 Յունիս։ Նշենք որ 15 Մայիս ուրբաթ օր մէկ օրուայ մէջ մահացող 3 անձերն ալ մրցանիշ մըն էին Հայաստանի հաշուոյն։