Հայ լեզուի եւ մշակոյթի ամառնային ծրագիր
Հայերէն լեզուի եւ առհասարակ հայ մշակոյթի հանդէպ տասնամեակներ շարունակուող անտարբերութիւնը վերջապէս կը վերածուի նոր հունի մը։ Յատկապէս Թուրքիոյ մէջ յանկարծակի ըսելու արժանի ժամանակահատուածի մէջ հայոց լեզուն, գրականութիւնը ընդհանուր առմամբ մշակոյթը կը գտնէ, արժանի հետաքրքրութիւնը։ Զանազան համալսարաններ կը հիմնեն հայերէնի դասընթացքներ, եթէ ոչ հայագիտութեան ամպիոններ։ Անցնող ժամանակահատուածին մէջ տիրող քայքայումին իբր հետեւանք շատ անգամ այս տեսակի նախաձեռնութիւնները կը դժուարանան պատրաստուած մասնագէտ գտնելու խնդրին մէջ։ Վերջերս Հրանդ Տինք Հիմնարկը յատուկ աշխատութիւն կը տանէր այս ոլորտէ ներս գոյացած պահանջը դիմագրաւելու համար։ Ի վերջոյ կատարուած աշխատութիւնները հասած են նոր նախագիծ մը իրականացնելու հանգրուանին։ Այս նախագիծը կը ներկայանայ հայոց լեզուի ու մշակոյթի մասին դասաւանդութեան դրութեամբ։ Արդարեւ հիմնարկը կը հաղորդէ թէ 11 Յուլիս- 12 Օգոստոս թուականներու միջեւ պիտի գործադրէ միամսեայ ծրագիր մը ձօնուած՝ հայ լեզուի եւ մշակոյթի։ Այս ծրագիրով պիտի դասաւանդուին արեւմտահայ լեզու երեք մակարդակներով։ Դասընթացքը պիտի տեւէ հինգ շաբաթ, իւրաքանչիւր շաբթուայ օրերու առաւօտեան երեք ժամերուն։ Աւարտին այս ընթացքը պիտի կազմէ 75 դասաժամ, որու տեւողութեամբ մասնակիցները պիտի ձեռքբերեն հետեւեալ կարողութիւնները։ Առաջին մակարդակին պիտի մասնակցին սկզբնակներ, որոնք պիտի սորվին այբուբենը, առօրեայ արտայայտութիւններու գործածութիւնը եւ ունակ պիտի ըլլան հայերէնով կազմուած պարզ նախադասութիւնները հասկնալու։ Երկրորդ մակարդակի հետեւողները արդէն առաջին մակարդակին տիրապետող յատկութիւն ունեցած պիտի ըլլան, ուր պիտի կրնան հասկնալ գրութեան մը պարունակութիւնը եւ արտայայտուիլ որոշ ոլորտներու մէջ։ Երրորդ մակարդակի հետեւողներ արդէն ունեցած պիտի ըլլան առաջին եւ երկրորդ մակարդակներուն թելադրած հիմնական գիտելիքները ու պիտի զարգացնեն լեզուի տիրապետելու իրենց մակարդակը։
Հայ մշակոյթի նիստեր պիտի կայանան Երկուշաբթիէն մինչեւ Հինգշաբթի ցերեկէ ետք։ Մշակոյթի դասընթացքները պիտի քննարկեն հայոց պատմութիւն, գրականութիւն, մշակոյթ, գեղարուեստ, պոլսահայ գաղութի պատմութիւն, հայկական քաղաքականութիւն եւ արդի խնդիրներ։ Բացի այս բոլորէն, պիտի կազմակերպուին նաեւ երաժշտութեան, պարի, խոհարարութեան, շարժանկարի աշխատանոցներ ու մշակութային շրջապտոյտներ, այցելութիւններ, զրոյցներ։
Լեզուի եւ մշակոյթի դասընթացքներուն կարելի է հետեւիլ որպէս իրար ամբողջացնող բաղադրեալներ եւ կամ որպէս առանձին դասընթացքներ։ Այս աշխատութեան մասնակցութեան համար կը պահանջուի ամբողջական ծրագիրի մասնակցողներէն 350 Եւրօ, իսկ միայն լեզուի կամ մշակոյթի դասընթացքներէն մէկը ընտրողներէն 200 Եւրօ։ Արձանագրութեան իբրեւ վերջին ժամկէտ ճշդուած է 1 Յուլիս թուականը։ Լրացուցիչ տեղեկութիւններ ստանալու համար կարելի է դիմել Տիկին Հերմինէ Սայանին [email protected] էլ-նամակով կամ +90 212 240 33 61 հեռախօսահամարով։
