Հայ գիրերու գիւտը փառաբանուեցաւ Տատեանի մէջ
3Նոյեմբեր Շաբաթ օր Պաքըրգիւղի Տատեան վարժարանի «Տիգրան Կիւլմեզկիլ» սրահին մէջ Ս. Թարգմանչաց տօնի առթիւ տեղի ունեցաւ երկու ձեռնարկներ։ Թաղի հոգեւոր հովիւ Տ. Տրդատ Քհնյ. Ուզունեան Հայ գիրերու գիւտին եւ հայոց այբուբենին մասին տեսողական ճոխ առարկաներով բանախօսութիւն մը կատարեց։
Մինչ բանախօսութեան սկիզբը տնօրէնուհի Ալիս Պայրամ ողջոյնի խօսք ուղղեց ներկաներուն։ Ապա Տէր Տրդատ հայրը պատմեց Մեսրոպ Մաշտոցի կեանքը, ուսումնասիրութիւնները եւ գործերը։ Ան յատկապէս անդրադարձաւ Մաշտոցի հայ գրերու պակասութիւնը ինչպէս վառ կերպով զգալու մասին։ Ապա պատմեց եթէ հայ գրերու գիւտը չըլլար ինչեր պակաս կը մնար հայ ինքնապահպանութեան պայքարին մէջ։ Քահանայ հայրը կ՚անդրադառնար նաեւ գիրերու ստեղծման եւ Սուրբ գիրքի թարգմանութեան պատմութիւններուն։
Այս բանախօսութեան առընթեր վարժարանին «Արէտ եւ Մոնիք Երկանեան» սրահին մէջ բացուեցաւ արուեստագէտուհի Մարի Թափուճուի մանրանկարչական ցուցահանդէսը։ Նոյն ցուցահանդէսին մաս կազմեցին նաեւ իր սաներու ստեղծագործութիւններէն նմուշներ։
